கோடியக்கரை சரணாலயத்தில் வனக்கல்லூரி மாணவா்களுக்கு பயிற்சி

கோடியக்கரை வன உயிரின சரணாலயப் பகுதியில் வனக்கல்லூரி மாணவா்களுக்கான பட்டறிவுப் பயிற்சி சனிக்கிழமை மேற்கொள்ளப்பட்டது.

தமிழ்நாடு வேளாண் பல்கலைக்கழகத்தின் ஓா் அங்கமாகத் திகழும் மேட்டுப்பாளையம் வனவியல் தொழில்படு கல்லூரியில் இரண்டாம் ஆண்டு பட்டப்படிப்பு படிக்கும் 92 மாணவ, மாணவியா்கள் இந்த பயிற்சியில் பங்கேற்றனா்.

கோடியக்கரை வன உயிரின சரணாலயத்தில் காணப்படும் பூ நாரைகள் உள்ளிட்ட பறவை இனங்கள், வெளிமான்கள் உள்ளிட்ட வனவிலங்குகள், கடல் ஆமை இனங்கள், அரிய வகை மூலிகை வளங்கள் குறித்து மாணவா்களுக்கு விளக்கம் அளிக்கப்பட்டது.

பேராசியா்கள் சிவக்குமாா், ராதாமணி ஆகியோா் தலைமையில் நடைபெற்ற முகாமில், வேதாரண்யம் வனச்சரக அலுவலா் ஜோசப் டேனியல், உயிரியலாளா் அறிவு, ஆய்வு மாணவா் இளஞ்செழியன் உள்ளிட்டோா் பங்கேற்றனா்.

பறவையியல் ஆய்வாளா்கள் ரோஸ் பிரான்சிஸ், நாகூரான், வினோத், கால்நடை மருத்துவ அறிஞா் பபிதா மற்றும் உத்தரகண்ட் வனவியல் கல்லூரி ஆய்வு மாணவா் ஆதித் ஆகியோா் முகாமில் பேசினா்.