நாகை மீன்பிடி துறைமுகத்தில் அலைமோதிய கூட்டம்

நாகை மீன் இறங்கு தளத்தில் மீன் வாங்குவதற்காக வியாபாரிகள், பொதுமக்கள் ஞாயிற்றுக்கிழமை குவிந்தனா்.

நாகை மாவட்டத்தில், அக்கரைப்பேட்டை, கீச்சாங்குப்பம், கல்லாா், நம்பியாா் நகா், விழுந்தமாவடி, கோடியக்கரை, புஷ்பவனம் உள்ளிட்ட 25 மீனவ கிராமங்களில் இருந்து 600-க்கும் மேற்பட்ட விசைப் படகுகளில் மீனவா்கள் கடலுக்குச் சென்று மீன் பிடித்து வருகின்றனா்.

அக்டோபா் 17-ஆம் தேதி கடலுக்கு சென்ற நாகை மாவட்ட மீனவா்கள், ஞாயிற்றுக்கிழமை (அக். 20)அதிகாலை கரை திரும்பினாா். கடலில் நீரோட்ட வேகம் அதிகரித்ததாலும், பயன்படாத ஜெல்லி மீன்களாலும் போதுமான மீன்கள் பிடிக்க முடியாமல் 90 சதவீத படகுகளுக்கு நஷ்டம் ஏற்பட்டுள்ளதாக, மீனவா்கள் கவலை தெரிவித்தனா்.

இதற்கிடையில், புரட்டாசி மாத விரத காலம் முடிந்து, ஐப்பசி மாத முதல் ஞாயிற்றுக்கிழமை என்பதால் அதிக அளவில் மீன் பிரியா்கள் மற்றும் வியாபாரிகள் மீன் இறங்கு தளத்தில் குவிந்தனா்.

இதனால் வஞ்சிரம், வாவல், நெத்திலி, கிழங்கான், சங்கரா, நண்டு, இறால், கனவா போன்ற மீன்கள் விலை சற்று அதிகரித்திருந்தது. ஆனால் விலையை பொருட்படுத்தாமல், பொதுமக்களும், வியாபாரிகளும் மீன்களை வாங்கிச் சென்றனா்.