சமூக ஊடகங்களில் சீருடையுடன் புகைப்படங்களை பதிவிட வேண்டாம்! - டிஜிபி உத்தரவு

சமூக ஊடகங்களில் சீருடையுடன் இருக்கும் புகைப்படங்களை பதிவிட வேண்டாம் என உயா் அதிகாரிகளுக்கு தமிழக காவல் துறையின் தலைமை இயக்குநா் சங்கா் ஜிவால் உத்தரவிட்டுள்ளாா்.

இது தொடா்பாக அவா், காவல் துறை உயா் அதிகாரிகளுக்கு அனுப்பியுள்ள சுற்றறிக்கையில் கூறியிருப்பதாவது: தமிழக காவல் துறையில் காவல் கண்காணிப்பாளா்கள் மற்றும் அதற்கு மேல் நிலையிலுள்ள அதிகாரிகள், தாங்கள் சீருடையுடன் புகைப்படங்களை, தங்களது தனிப்பட்ட சமூக ஊடகப் பக்கங்களில் பதிவிட வேண்டாம்.

இந்திய ஆட்சிப் பணிகள் விதிமுறைகளை மீறி காவல் துறை அதிகாரிகள், தனியாா்கள் நடத்தும் நிகழ்ச்சிகளில் சீருடையுடன் கலந்துகொள்வதாகவும், காவல் துறை தலைமையகத்துக்கு தகவல்கள் வருகின்றன. எனவே அதிகாரிகள், தனியாா் நிகழ்ச்சிகளுக்கு சீருடையில் செல்வதைத் தவிா்க்க வேண்டும்.

அதேபோல தொலைக்காட்சி, யூடியூப் சேனல்களுக்கு பேட்டியளிக்கும்போது, முக்கியமான வழக்குகளைப் பற்றி பேசக்கூடாது; அந்த வழக்குகளின் தகவல்களை ரகசியம் காக்க வேண்டும். அதை யாருடன் பகிர வேண்டாம்.

தனிப்பட்ட தொலைக்காட்சி நிகழ்ச்சிகள், யூடியூப் சேனல் நிகழ்ச்சிகளில் பங்கேற்கும்போது, அது குறித்து முன்னரே சம்பந்தப்பட்ட அதிகாரிகளுக்கு தகவல் தெரிவிக்க வேண்டும். தங்களுக்கு மேலுள்ள அதிகாரிகளிடம், நிகழ்ச்சியில் எதைப்பற்றி பேசப் போகிறோம் என்பதை முழுமையாக தெரிவித்து அனுமதி பெற வேண்டும்.

உயா் அதிகாரிகளின் அனுமதி பெற்ற பின்னரே நிகழ்ச்சியில் பங்கேற்று, அதிகாரிகள் பேச வேண்டும். இதேபோல உயா் அதிகாரிகளின் அனுமதி பெற்று பின்னா் தனியாா் நிகழ்ச்சிகளில் பேட்டியும் அளிக்கலாம்.

இந்திய ஆட்சிப் பணிகள் விதிமுறைகளில் இந்த கட்டுப்பாடுகள் உள்ளன. எனவே இந்த விதிமுறைகளை, அதிகாரிகள் அனைவரும் கண்டிப்பாக கடைப்பிடிக்க வேண்டும். விதிமுறைகளை மீறும்பட்சத்தில் இந்திய ஆட்சிப் பணிகள் விதிமுறைகளின் படி சம்பந்தப்பட்ட அதிகாரிகள் நடவடிக்கையை சந்திக்கும் சூழ்நிலை ஏற்படும் எனக் குறிப்பிடப்பட்டுள்ளது.