சாதிப் பெயர்களை நீக்கும் அரசாணைக்கு தடை! - இடைக்கால உத்தரவில் உயர் நீதிமன்ற கிளை தெரிவித்தது என்ன?

தமிழ்நாட்டில் குடியிருப்புகள், தெருக்கள், சாலைகள், கிராமப்பெயர்களில் உள்ள சாதியப் பெயர்களை நீக்க தமிழக அரசு பிறப்பித்த அரசாணைக்கு உயர் நீதிமன்ற மதுரைக்கிளை இடைக்காலத் தடை விதித்து உத்தரவிட்டது பரபரப்பை ஏற்படுத்தியுள்ளது.

தமிழக அரசு இந்த அரசாணையை பிறப்பித்தபோதே ஆதரவும், எதிர்ப்பும் கிளம்பியது. இதற்கிடையே கோவையிலுள்ள தமிழகத்தின் நீளமான மேம்பாலத்துக்கு ஜி.டி.நாயுடு என பெயர் சூட்டியது கடும் விமர்சனத்தை ஏற்படுத்த, அது விதி விலக்கான பெயர் என்று அரசுத் தரப்பில் சொல்லப்பட்டது. ஆனாலும், 'சாதிப்பெயர் நீக்கம் குறித்த கொள்கையில் தமிழக அரசு குழப்புகிறது' என்று எதிர்க்கட்சியினரால் விமர்சிக்கப்பட்டு வருகிறது.

இந்த நிலையில்தான் மதுரையைச் சேர்ந்த பரமசிவம் என்பவர் உயர் நீதிமன்ற மதுரைக் கிளையில் தாக்கல் செய்த மனுவில், "தமிழக முதலமைச்சர் அறிவிப்பின்படி தமிழ்நாட்டில் குடியிருப்புகள், தெருக்கள், சாலைகள், நீர் நிலைகளுக்கு வைக்கப்பட்டுள்ள சாதிப் பெயர்களை நீக்குவதற்கான வழிகாட்டு நெறிமுறைகளை அவசர கதியில் உருவாக்கி தமிழக அரசு அரசாணை வெளியிட்டுள்ளது. அதன்படி, . ஆதி திராவிடர் காலனி, ஹரிஜன் குடியிருப்பு, வண்ணான்குளம் போன்ற சாதிப்பெயர்களை நீக்குதல், புதிய பெயரிடும் பணிகளை நவம்பர் 19 ஆம் தேதிக்குள் முடிக்கவும் தமிழக அரசு உத்தரவிட்டுள்ளது. நடைமுறையில் பல பிரச்னைகள் உள்ளது, மக்களின் தனிப்பட்ட ஆவணங்களில பெயர் மாற்றம் செய்வதில் நடைமுறைச் சிரமங்கள் உள்ளன. இது அரசியலமைப்பு சட்டம், பாரம்பரியம், பண்பாட்டிற்கு எதிரானது. எனவே சாதிப்பெயர்களை நீக்கும் இந்த அரசாணைக்கு தடை விதிக்க வேண்டும்" என்று கூறியிருந்தார்.

இந்த மனு, நீதிபதிகள் அனிதா சுமந்த், குமாரப்பன் அமர்வு முன் விசாரணைக்கு வந்தபோது, மனுதாரர் தரப்பில் ஆஜரான வழக்கறிஞர் கார்த்திகேயன், " தமிழக அரசின் இந்த திடீர் உத்தரவு குழப்பம் ஏற்படுத்தும், ஆதார், வாக்காளர் அட்டை, வாகனப் பதிவு சான்றிதழ், பாஸ்போர்ட் உள்ளிட்ட அரசு ஆவணங்களின் முகவரியில் பெயர் மாற்றம் செய்வதில் சிக்கல் ஏற்படும், இதை கருத்தில் கொள்ளாமல் தமிழக அரசு இந்த அறிவிப்பாணையை வெளியிட்டுள்ளது, எனவே இதற்கு தடை விதிக்க வேண்டும்" என வாதிட்டார்.

அப்பொழுது நீதிபதிகள், "எந்த முன்னறிவிப்பும் இல்லாமல் இவ்வாறு செய்தால் பள்ளி, கல்லூரி ஆவணங்கள், வருமான வரி அட்டை உள்ளிட்ட அரசு ஆவணங்களில் உடனடியாக எப்படி முகவரி மாற்றம் செய்வார்கள்?" என கேள்வி எழுப்பினார்கள்

அரசு தரப்பில் ஆஜரான கூடுதல் தலைமை வழக்கறிஞர் அஜ்மல் கான், "மனுதாரர் மனுச் செய்ததில் உள்நோக்கம் உள்ளது. அரசியலமைப்பு சட்டம் சமத்துவத்தை வலியுறுத்துகிறது. தீண்டாமை கூடாது என்கிறது, சமூக நீதியை பின்பற்றும் வகையில் அரசாணை பிறப்பிக்கப்பட்டுள்ளது. இதனால் எப்படி மக்களுக்குப் பாதிப்பு ஏற்படும் என்று மனுதாரர் குறிப்பிடவில்லை.

இந்தியாவில் உ.பி-யில் அலகாபாத் நகரம் பிராயக்ராஜாகவும், மகாராஷ்டிராவில் அவுரங்காபாத் சத்ரபதி சம்பாஜி என்றும் டெல்லியில் பல சாலைகள் மற்றும் தெருக்களுக்கு பெயர் மாற்றம் செய்யப்பட்டபோதெல்லாம் வராத குழப்பம் இப்போது மட்டும் எப்படி வந்துவிடப் போகிறது? அங்கு போய் மனுதாரர் தடை கோரி மனு தாக்கல் செய்யவில்லை. ஆனால், சாதிய பாகுபாடு இருக்கக் கூடாது என்று தமிழ்நாடு அரசு கொள்கை ரீதியான முடிவெடுத்து அறிவித்திருப்பதற்கு எதிராக மனு தாக்கல் செய்யப்பட்டுள்ளது, தமிழகத்தில் ஆட்சேபேனை இருந்தால் மக்கள் கருத்து தெரிவிக்க மாநில அரசு அவகாசம் அளித்துள்ளது. மக்களின் கருத்துகளை மதிப்பீடு செய்து முடிவெடுக்கப்படும். இழிவுபடுத்தும் வகையில் பெயர்கள் இருந்தால் நீக்கப்படும். தற்போது உத்தேசமாகத்தான் அறிவிப்பு வெளியிட்டுள்ளது. இது இறுதியானது அல்ல. எனவே, இந்த மனுவை தள்ளுபடி செய்ய வேண்டும்." என்று வாதிட்டார்.

அப்போது நீதிபதிகள், "சாதிப் பெயர்கள் நீக்குவது குறித்து மாநில அரசு எடுத்துள்ள நடவடிக்கைகள் பாராட்டத்தக்கது. அதே நேரத்தில் இதற்கு என்ன வழிமுறைகள் வகுக்கப்பட்டுள்ளது என்பது குறித்து தெளிவுபடுத்தவில்லை, பல்வாறு நடைமுறைச் சிரமங்கள் உள்ளதாக மனுதாரர் தரப்பில் கூறப்படுகிறது, எனவே அது குறித்து பதில் மனு தாக்கல் செய்யுங்கள், அதுவரை சாதியப் பெயர்கள் மாற்றுவது குறித்து மக்களிடம் கருத்து கேட்பது, ஆய்வு நடத்துவது செய்து கொள்ளலாம், ஆனால் இறுதி முடிவு எதுவும் எடுக்க வேண்டாம்" என உத்தரவிட்டு, ''இம்மனு குறித்து தமிழக அரசு தரப்பில் இரண்டு வாரங்களில் விரிவான பதில் மனு தாக்கல் செய்ய வேண்டும்" என உத்தரவிட்டனர்.