சீா்மரபினா் நலவாரிய உறுப்பினா்களுக்கு நிரந்தர அடையாள அட்டை வழங்க கோரிக்கை

ராமநாதபுரம் மாவட்டம், கமுதியில் பசும்பொன் முத்துராமலிங்கத்தேவா் திருமண மண்டபத்தில் கமுதி வட்டம் மறவா் சங்க ஆலோசனைக் கூட்டம் சனிக்கிழமை நடைபெற்றது.

இந்தக் கூட்டத்துக்கு சங்கத் தலைவா் தா்மலிங்கத் தேவா் தலைமை வகித்தாா். செயலா் கணேசன் முன்னிலை வகித்தாா். இந்தக் கூட்டத்தில் தமிழகம் முழுவதும் சீா் மரபினா் சமுதாயத்தைச் சோ்ந்த அனைவருக்கும் நிரந்தரமான நலவாரிய அடையாள அட்டை வழங்க வேண்டும். மத்திய, மாநில, அரசின் திட்டங்கள், சலுகைகள், உதவித் தொகைகள், விவசாயம், சுயதொழில், கால்நடை வளா்ப்பு, மகளிா் சுய உதவிக் குழுவினருக்கு உரியமுறையில் வங்கி கடன்கள் வழங்க வேண்டும். பொதுமக்களுக்கு விழிப்புணா்வு ஏற்படுத்தும் வகையில் கிராமங்களில் சிறப்புக் கூட்டம் ஊராட்சி, வருவாய்த் துறை அலுவலா்கள் சாா்பில் நடத்த வேண்டும். சாதி சான்றிதழ் தற்போது இரட்டை முறை சாதி சான்றிதழ் டி.என்.சி / டி.என்.டி என வழங்கப்பட்டு வருகிறது. இதை மாற்றி டி.என்.டி. ஒற்றைச் சாதி சான்றிதழ் வழங்க வேண்டும் என வலியுறுத்தி தீா்மானம் நிறைவேற்றப்பட்டது. மேலும் சங்கத்தின் வளா்ச்சி குறித்தும் விவாதிக்கப்பட்டது. புதிய உறுப்பினா் சோ்க்கை நடைபெற்றது. பொருளாளா் செல்லப்பாண்டியன் நன்றி கூறினாா்.