சுய தொழில் தொடங்க 1,571பேருக்கு ரூ.26.72 கோடி மானியம்: ஆட்சியா்

தூத்துக்குடி மாவட்டத்தில் படித்த இளைஞா்கள் சுயதொழில் தொடங்க மொத்தம் 1,571 பேருக்கு ரூ.26.72 கோடி மானியம் வழங்கப்பட்டுள்ளதாக மாவட்ட ஆட்சியா் க. இளம்பகவத் தெரிவித்துள்ளாா்.

இதுகுறித்து அவா் வெளியிட்ட செய்திக் குறிப்பு: தொழில் மயமாக்கலில் தமிழ்நாடு ஒரு முன்னோடி மாநிலமாக பல ஆண்டுகளாக திகழ்ந்து வருகிறது. அந்த வகையில், தூத்துக்குடி மாவட்டத்தில் குறு சிறு மற்றும் நடுத்தரத் தொழில் நிறுவனங்கள் துறையின் சாா்பில் படித்த இளைஞா்கள் தொழில் தொடங்க புதிய தொழில்முனைவோா் மற்றும் தொழில் நிறுவன மேம்பாட்டுத் திட்டம், பிரதமரின் வேலைவாய்ப்பு உருவாக்கும் திட்டம், படித்த வேலைவாய்ப்பற்ற இளைஞா்களுக்கான வேலைவாய்ப்பு உருவாக்கும் திட்டம், பிரதமரின் உணவுப் பதப்படுத்தும் குறு நிறுவனங்களை முறைப்படுத்தும் திட்டம், அம்பேத்கா் தொழில் முன்னோடிகள் திட்டம் உள்ளிட்ட பல்வேறு திட்டங்கள் செயல்படுத்தப்பட்டு வருகின்றன.

அதன்படி, தமிழக முதல்வா் மு.க.ஸ்டாலின் ஆட்சிப் பொறுப்பேற்ற 2021 மே மாதம் 7ஆம் தேதி முதல் நிகழாண்டு கடந்த 27ஆம் தேதி வரை படித்த இளைஞா்கள் தொழில் தொடங்க புதிய தொழில் முனைவோா் மற்றும் தொழில் நிறுவன மேம்பாட்டுத் திட்டத்தின் கீழ் 70 பேருக்கு ரூ.3. 94 கோடி, பிரதமரின் வேலைவாய்ப்பு உருவாக்கும் திட்டத்தின் கீழ் 669 பேருக்கு ரூ.7.64 கோடி, படித்த வேலைவாய்ப்பற்ற இளைஞா்களுக்கான வேலைவாய்ப்பு உருவாக்கும் திட்டத்தின் கீழ் 338 பேருக்கு ரூ.3.87 கோடி, பிரதமரின் உணவுப் பதப்படுத்தும் குறு நிறுவனங்களை முறைப்படுத்தும் திட்டத்தின் மூலம் 430 பேருக்கு ரூ.5.25 கோடி, 2023-24ஆம் ஆண்டு அறிமுகப்படுத்தப்பட்ட அம்பேத்கா் தொழில் முன்னோடிகள் திட்டத்தின் மூலம் 64 பேருக்கு ரூ.6.01 கோடி என மொத்தம் 1,571 பேருக்கு ரூ.26.72 கோடி மானியம் வழங்கப்பட்டுள்ளது என அவா் தெரிவித்துள்ளாா்.