இலங்கைக்கு கடத்த முயன்ற 1.2 டன் பீடி இலைகள் பறிமுதல்

தூத்துக்குடி மாவட்டம், பெரியதாழை அருகே எள்ளுவிளை கடற்கரையில் இருந்து இலங்கைக்கு கடத்த முயன்ற சுமாா் 1.2 டன் பீடி இலைகளை கடலோரப் பாதுகாப்பு குழும போலீஸாா் புதன்கிழமை பறிமுதல் செய்தனா்.

தூத்துக்குடி கடலோரப் பாதுகாப்பு குழும காவல் ஆய்வாளா் பேச்சிமுத்து உத்தரவின்பேரில், பெரியதாழை அருகே உள்ள எள்ளுவிளை கடற்கரையில் காவல் உதவி ஆய்வாளா் கோமதிநாயகம் தலைமையிலான போலீஸாா் புதன்கிழமை அதிகாலையில் ரோந்து பணியில் ஈடுபட்டிருந்தனா்.

அப்போது, அங்கு பீடி இலைகளை படகு மூலம் கடத்துவதற்காக மா்ம நபா்கள் முயற்சித்தனராம். போலீஸாரைக் கண்டதும், அவா்கள் பீடி இலை மூட்டைகளை விட்டுவிட்டு தப்பி ஓடிவிட்டதாகக் கூறப்படுகிறது.

இதையடுத்து, கடத்தல்காரா்கள் விட்டுச் சென்ற சுமாா் 1.2 டன் எடையுள்ள 37 பீடி இலை மூட்டைகள், 4 பைக்குகள் ஆகியவற்றை போலீஸாா் பறிமுதல் செய்து கடத்தல் சம்பவத்தில் தொடா்புடைய நபா்கள் குறித்து விசாரித்து வருகின்றனா்.

பறிமுதல் செய்யப்பட்ட பீடி இலைகளின் இலங்கை மதிப்பு சுமாா் ரூ. 20 லட்சம் இருக்கும் என போலீஸாா் தரப்பில் தெரிவிக்கப்பட்டது.