20 கிலோ தங்கம், 300 கேள்விகள்; தாம்பரம் ரூ.4 கோடி விவகாரத்தில் புதுச்சேரி பாஜக எம்.பி-யிடம் விசாரணை!

கடந்த 2024 நாடாளுமன்றத் தேர்தலின்போது தாம்பரம் ரயில் நிலையத்தில் சோதனையில் இருந்த பறக்கும் படையினர், நெல்லை எக்ஸ்பிரஸ் ரயிலில் கொண்டு செல்லப்பட்ட ரூ.4 கோடியைப் பறிமுதல் செய்தனர். தொடர்ந்து அந்தப் பணத்தை எடுத்துச் சென்ற பா.ஜ.க எம்.எல்.ஏ நயினார் நாகேந்திரனின் ஹோட்டல் மேலாளர் உள்ளிட்ட நான்கு பேரைக் கைதுசெய்தனர். அவர்களிடம் நடத்திய விசாரணையில், அந்த நாடாளுமன்றத் தேர்தலில் திருநெல்வேலி தொகுதி வேட்பாளராக போட்டியிட்ட நயினார் நாகேந்திரனுக்குச் சொந்தமானது என்று அவர்கள் வாக்குமூலம் அளித்தனர்.

அதையடுத்து வாக்காளர்களுக்கு கொடுப்பதற்காகவே நயினார் நாகேந்திரன் அந்தப் பணத்தை எடுத்துச் சென்றிருக்கிறார் என்று குற்றச்சாட்டு எழுந்தது. தொடர்ந்து நயினார் நாகேந்திரனின் உதவியாளர் மணிகண்டன், பா.ஜ.க-வின் அமைப்புச் செயலாளர் கேசவ விநாயகம் உள்ளிட்டவர்களிடம் விசாரணை செய்தது சி.பி.சி.ஐ.டி.

அதையடுத்து சென்னை சௌகார்பேட்டையைச் சேர்ந்த சூரஜ் மற்றும் பங்கஜ் லால்வானியிடம் நடத்தப்பட்ட விசாரணையில், ``புதுச்சேரி பா.ஜ.க-வின் தலைவரும், ராஜ்ய சபா எம்.பி-யுமான செல்வகணபதி 20 கிலோ தங்கக் கட்டிகளை எங்களிடம் கொடுத்து விற்றுத் தருமாறு கூறினார். அதன்படி சென்னை என்.எஸ்.சி போஸ் சாலையில் உள்ள ஒரு தங்க வியாபாரியிடம் 15 கிலோ தங்கத்தையும், புதுச்சேரியில் 5 கிலோ தங்கத்தையும் கமிஷன் அடிப்படையில் விற்றுக் கொடுத்தோம்” என்று வாக்குமூலம் அளித்தனர்.

அதையடுத்து சில மாதங்களுக்கு முன்பு செல்வகணபதிக்கு சம்மன் அனுப்பியது சி.பி.சி.ஐ.டி. ஆனால் உடல் நிலையைக் காரணம் காட்டி அப்போது தட்டிக்கழித்த செல்வகணபதி சி.பி.சி.ஐ.டி கொடுத்த அழுத்தத்தால், எழும்பூரில் உள்ள தலைமை அலுவலகத்தில் ஆஜரானார். சுமார் 10 மணி நேரம் நடைபெற்ற விசாரணையில், அவரிடம் 300-க்கும் மேற்பட்ட கிடுக்கிப்பிடி கேள்விகள் கேட்கப்பட்டு, பதிவு செய்யப்பட்டிருப்பதாக தகவல்கள் வெளியாகியிருக்கின்றன.