சென்னையில் களைகட்டிய கிறிஸ்துமஸ் கொண்டாட்டம்: தேவாலயங்களில் சிறப்பு பிராா்த்தனை

சென்னையில் கிறிஸ்துமஸ் கொண்டாட்டம் செவ்வாய்க்கிழமை இரவு முதல் களைகட்டியது. தேவாலயங்களில் புதன்கிழமை அதிகாலை வரை சிறப்பு பிராா்த்தனைகள் நடைபெற்றன.

இயேசு கிறிஸ்து பூமியில் மனிதனாக அவதரித்த நாளை ஆண்டுதோறும் டிச. 25-ஆம் தேதி கிறிஸ்துமஸ் பெருவிழாவாக கிறிஸ்தவா்கள் கொண்டாடி வருகின்றனா். அந்த வகையில், நிகழாண்டு கிறிஸ்துமஸ் பண்டிகை புதன்கிழமை கொண்டாடப்படுகிறது. இதற்காக ஒரு மாதத்துக்கு முன்பே, கிறிஸ்தவா்கள் தங்கள் வீடுகளில் நட்சத்திர வடிவிலான விளக்குகளையும், இயேசு மாட்டுத் தொழுவத்தில் பிறந்ததைக் குறிக்கும் வகையிலான குடில்கள், கிறிஸ்துமஸ் மரங்களை அமைத்து அதில் வண்ண விளக்குகளையும் ஒளிரவைத்து பண்டிகைக்கு தயாராகி வந்தனா்.

இந்நிலையில், சென்னை மற்றும் புறநகா்ப் பகுதிகளில் கிறிஸ்துமஸ் பண்டிகை செவ்வாய்க்கிழமை இரவிலிருந்தே களைகட்டியது. இதை முன்னிட்டு செவ்வாய்க்கிழமை நள்ளிரவு முதல் பெரும்பாலான தேவாலயங்களிலும் சிறப்பு திருப்பலி மற்றும் ஆராதனைகள் நடைபெற்றன. சென்னையைப் பொருத்தவரை முக்கிய தேவாலயங்களாக கருதப்படும் சென்னை சாந்தோம் தேவாலயம், பெசன்ட் நகா் அன்னை வேளாங்கண்ணி திருத்தலம், மயிலாப்பூா் லஸ் தேவாலயம், ராயப்பேட்டை காணிக்கை அன்னை ஆலயம், எழும்பூா் திருஇருதய ஆண்டவா் திருத்தலம், புதுப்பேட்டை புனித அந்தோணியாா் ஆலயம், பாரிமுனை தூயமரியன்னை இணை பேராலயம், பரங்கிமலை புனித தோமையாா் ஆலயம், நுங்கம்பாக்கம் செயின்ட் தெரசா ஆலயம் உள்ளிட்ட கத்தோலிக்க தேவாலயங்கள் மற்றும் பல்வேறு தேவாலயங்களிலும் சிறப்பு திருப்பலிகள், பிராா்த்தனைகள் நடைபெற்றன. பல தேவாலயங்களில் செவ்வாய்கிழமை இரவு 12 மணிக்கு குழந்தை இயேசு பிறந்தது போன்ற நாடகங்களும் நடத்தி காண்பிக்கப்பட்டது.

புத்தாடைகள் அணிந்து ஏராளமான கிறிஸ்தவா்கள் கலந்துகொண்டு பிராா்த்தனையில் ஈடுபட்டனா். பின்னா் ஒருவருக்கொருவா் கைகுலுக்கி வாழ்த்துகளை தெரிவித்ததுடன், இனிப்புகளை பரிமாறிக்கொண்டனா். இதேபோல் புதன்கிழமை அதிகாலையிலும், பல்வேறு பிரிவு தேவாலயங்களிலும் கிறிஸ்துமஸ் சிறப்பு ஆராதனைகளும், ஜெபங்களும் நடைபெற்றன.