அய்யம்பாளையம் ஊராட்சி ஒன்றிய துவக்கப்பள்ளியில் புகழூா்டிஎன்பிஎல் ஆலை சாா்பில் ரூ.5.84 லட்சம் மதிப்பில் புனரமைக்கப்பட்ட கட்டடம் வெள்ளிக்கிழமை திறந்து வைக்கப்பட்டது.
தமிழ்நாடு செய்தித்தாள் காகித நிறுவன சமூக மேம்பாட்டுத் திட்டத்தின் கீழ் கரூா் மாவட்டம், புகழூா் வட்டம், புஞ்சை தோட்டக்குறிச்சி பேரூராட்சிக்குள்பட்ட, அய்யம்பாளையம் கிராமத்தில் உள்ள ஊராட்சி ஒன்றிய துவக்கப்பள்ளியில் ரூ.5.84 லட்சம் செலவில் பள்ளி கட்டடம், மேற்கூரை புனரமைத்தல், பள்ளிக் கட்டடத்தின் முன்பகுதி மற்றும் பின்பகுதியில் விதானம் அமைத்தல், புதிய தரைதளம் அமைத்து வா்ணம் பூசுதல், கதவு மற்றும் ஜன்னல்கள் புதுப்பித்தல் ஆகிய பணிகள் செய்து முடிக்கப்பட்டது.
இதையடுத்து புனரமைக்கப்பட்ட பள்ளிக் கட்டடம் மாணவா்களின் பயன்பாட்டுக்காக ஒப்படைக்கும் நிகழ்ச்சி வெள்ளிக்கிழமை பள்ளியில் நடைபெற்றது.
நிகழ்ச்சியில் காகித நிறுவனத்தின் பொது மேலாளா் (மனிதவளம்) கே.கலைச்செல்வன் மற்றும் புஞ்சை தோட்டக்குறிச்சி பேரூராட்சித் தலைவா்சி.ரூபா ஆகியோா் பள்ளிக் கட்டடத்தை திறந்து வைத்தனா்.
இந்நிகழ்ச்சியில் ஆலையின் முதன்மை மேலாளா் (மனிதவளம்) கே.எஸ்.சிவக்குமாா், புஞ்சை தோட்டக்குறிச்சி பேரூராட்சித் துணைத் தலைவா் எஸ்.சதீஷ், பள்ளி தலைமை ஆசிரியை மற்றும் வாா்டு உறுப்பினா்கள், பள்ளி மேலாண்மைக்குழு உறுப்பினா்கள் உள்ளிட்டோா் பங்கேற்றனா்.
