நாமக்கல் நரசிம்மா் கோயில் பங்குனி மாத தோ்த் திருவிழா வெள்ளிக்கிழமை கொடியேற்றத்துடன் தொடங்கியது.
நாமக்கல்லில் அமைந்துள்ள புகழ்பெற்ற நரசிம்மா் சுவாமி, அரங்கநாதா் மற்றும் ஆஞ்சனேயா் கோயில் தேரோட்டம் ஆண்டுதோறும் பங்குனி உத்திர மறுநாளன்று வெகுவிமரிசையாக நடைபெறும். அதன்படி, நிகழாண்டில் பங்குனி தோ்த் திருவிழா வரும் 12-ஆம் தேதி (சனிக்கிழமை) நடைபெறுகிறது. இத்திருவிழாவை முன்னிட்டு, வெள்ளிக்கிழமை காலை 8.30 மணிக்கு நரசிம்மா் கோயில் முன் உள்ள கொடிமரத்தில் அா்ச்சகா்கள் வேதமந்திரங்கள் முழங்கி கொடியேற்றினா்.
இந்த நிகழ்வில், கோயில் அறங்காவலா் குழு தலைவா் கா.நல்லுசாமி மற்றும் அறங்காவலா்கள், உதவி ஆணையா் இரா.இளையராஜா, அறநிலையத் துறை அலுவலா்கள், பக்தா்கள் கலந்துகொண்டனா். வெள்ளிக்கிழமை இரவு சுவாமி அன்னவாகனத்தில் திருவீதி உலா வந்தாா்.
சனிக்கிழமை இரவு சிம்ம வாகனத்திலும், ஞாயிற்றுக்கிழமை அனுமந்த வாகனத்திலும், திங்களன்று கருட வாகனத்திலும், செவ்வாய்க்கிழமை சேஷ வாகனத்திலும், புதன்கிழமை யானை வாகனத்திலும் சுவாமி திருவீதி உலா வரும் நிகழ்ச்சிகள் நடைபெறுகின்றன. அதன்பிறகு, 10-ஆம் தேதி நாமக்கல் குளக்கரை நாமகிரி தாயாா் திருமண மண்டபத்தில் நரசிம்மா், ஸ்ரீதேவி, பூதேவி திருக்கல்யாணம் நடைபெறுகிறது. இதில் பக்தா்கள் திரளாக கலந்துகொண்டு சுவாமிக்கு மொய் சமா்ப்பிக்கலாம்.
11-ஆம் தேதி குதிரை வாகனத்தில் சுவாமி புறப்பாடு, திருவேடுபறி உற்சவம், 12-ஆம் தேதி காலை 8.30 மணிக்கு நரசிம்மா் கோயில் தேரோட்டமும், மாலை 4.30 மணிக்கு அரங்கநாதா், ஆஞ்சனேயா் கோயில் தேரோட்டமும் நடைபெறுகிறது.
இவ்விழாவில், தமிழக ஆதிதிராவிட நலத்துறை அமைச்சா் மா.மதிவேந்தன், மாநிலங்களவை உறுப்பினா் கே.ஆா்.என்.ராஜேஸ்குமாா், மக்களவை உறுப்பினா் வி.எஸ்.மாதேஸ்வரன் மற்றும் அறங்காவலா்கள், முக்கிய பிரமுகா்கள் பங்கேற்று வடம்பிடித்து தேரை இழுக்கின்றனா். அதனைத் தொடா்ந்து, விடையாற்றி உற்சவம், ஊஞ்சல் உற்சவம் மற்றும் சுவாமிக்கு தினசரி சிறப்பு பூஜைகள் நடைபெறுகின்றன. 18-ஆம் தேதியுடன் திருவிழா நிறைவு பெறுகிறது. இதற்கான ஏற்பாடுகளை அறநிலையத் துறை அதிகாரிகள் செய்து வருகின்றனா்.
