தமிழகத்தில் வரும் 2026-இல் அதிமுக ஆட்சி: அதிமுக பொருளாளா் திண்டுக்கல் சீனிவாசன்

தமிழகத்தில் வரும் 2026-இல் அதிமுக ஆட்சி அமைவதை யாராலும் தடுக்க முடியாது என அக் கட்சியின் பொருளாளா் திண்டுக்கல் சீனிவாசன் தெரிவித்தாா்.

திருச்சியில் செவ்வாய்க்கிழமை நடைபெற்ற அதிமுக மாநகா் மாவட்ட கள ஆய்வுக் கூட்டத்தில் அவா் பேசியது: திமுக ஆட்சியில் விலைவாசி உயா்வு, மின்கட்டண உயா்வு, சொத்துவரி உயா்வு, உள்ளாட்சிகளில் அனைத்துக் கட்டணங்கள் உயா்வு என மக்கள் மீது கடும் சுமை இறக்கப்பட்டுள்ளது. அதிமுக ஆட்சியில் எதற்கெடுத்தாலும் போராட்டம் நடத்திய கம்யூனிஸ்ட் கட்சியினா், இப்போது எங்கும் போராடுவதில்லை.

முதல்வா் தனது பதவிக்குரிய மரியாதையை அறியாமல், எதிா்க்கட்சித் தலைவா் மீது சொல்லக் கூடாத வாா்த்தைகளைப் பயன்படுத்தி விமா்சனம் செய்கிறாா். மக்களுக்கான திட்டங்கள் அதிகம் அதிமுக ஆட்சியிலா, திமுக ஆட்சியிலா என்ற விவாதத்தை எங்கள் கட்சியின் மாவட்டச் செயலா்களுடன் துணை முதல்வா் நடத்தலாம்.

எதிா்க்கட்சித் தலைவருடன் விவாதிக்க தகுதி வேண்டும். போதைப் பொருள்கள் புழக்கம் அதிகரித்துள்ளது. ஊழல் செய்து சிறைக்குச் சென்றவா்களை மீண்டும் அமைச்சராக்கி அழகு பாா்க்கிறாா் முதல்வா். சட்டம்-ஒழுங்கு சீா்குலைந்துவிட்டது. திமுக ஆட்சி மீது மக்கள் அதிருப்தியில் உள்ளனா்.

அதிமுக-வின் உண்மையான தொண்டா்கள் அனைவரும் எடப்பாடி பழனிசாமி பின்னால் உள்ளனா். வரும் 2026இல் அதிமுக ஆட்சி அமைவதை எந்தக் கொம்பனாலும் தடுக்க முடியாது. அறிஞா் அண்ணாவை தமிழக முதல்வராக அமரச் செய்து, திமுக-வை ஆட்சிக் கட்டிலில் அமா்த்திய பங்கு எம்ஜிஆருக்கு மட்டுமே உண்டு. அண்ணாவே தனது ஆட்சி அமைந்தவுடன் இதனை பகிரங்கமாகக் கூறினாா்.

அத்தகைய தலைவா் எம்ஜிஆா் உருவாக்கிய அதிமுக, 53 ஆண்டுகளில் 32 ஆண்டுகள் ஆட்சியில் அமா்ந்து மக்களுக்கு பல்வேறு நலத்திட்டஙகளை அளித்துள்ளது. மக்களவைத் தோ்தல் வேறு, பேரவைத் தோ்தல் வேறு என்பதை தமிழக மக்கள் உணா்ந்துள்ளனா். மு.க.ஸ்டாலின் தலைமையிலான ஆட்சியை முடிவுக்கு கொண்டுவர அதிமுக-வினா் ஒருங்கிணைந்து பணியாற்ற வேண்டும் என்றாா் அவா்.

இந்த நிகழ்வில், முன்னாள் அமைச்சா்கள் நல்லுசாமி, தங்கமணி, கோகுல இந்திரா, அமைப்புச் செயலா் டி. ரத்தினவேல், மாநகா் மாவட்ட செயலா் ஜெ. சீனிவாசன் உள்ளிட்ட பலா் கலந்து கொண்டு பேசினா்.

‘எடப்பாடியாா் முதல்வராக வேண்டும்’

அதிமுக முன்னாள் அமைச்சா் ப. தங்கமணி பேசியது: திருவரங்கம் தொகுதியில் ஜெயலலிதா வெற்றி பெற்று ஆட்சி அமைத்தபோது திருச்சி மாவட்டமே அதிமுக கோட்டையாக இருந்தது. ஆனால், அதன் பின்னா் நடைபெற்ற தோ்தல்களில் தொடா்ந்து தோல்வியைச் சந்திக்க நேரிட்டுள்ளது. நிா்வாகிகளிடையே கருத்து வேறுபாடு நிலவுவதுதான் இதற்கு காரணம். யாரை வேட்பாளராகவோ, கட்சிப் பதவிக்கோ அறிவித்தாலும் அவருக்கு எதிராக ஒரு அணியாக செயல்படுவது வழக்கமாகிவிட்டது.

இப்போது, திருச்சி மாவட்டத்தில் 9-இல் ஒரு தொகுதியில் கூட அதிமுக இல்லை. மாநகராட்சி, நகராட்சி, பேரூராட்சி உள்ளிட்ட உள்ளாட்சிப் பதவிகளிலும் ஒருவா்கூட இல்லை. இப்படியே கருத்துவேறுபாடுகளுடன் இருந்தால் எதிா்க்கட்சியாகவே இருக்க வேண்டியதிருக்கும். வரும் தோ்தலில் யாா் வேட்பாளராக நிறுத்தப்பட்டாலும், அதிமுக ஆட்சிக் கட்டிலில் அமர வேண்டும். எடப்பாடியாா் முதல்வராக வேண்டும் என்ற நோக்கத்தில் பணியாற்ற வேண்டும் என்றாா் அவா்.