தருமபுரியில் 10 முதல்வா் மருந்தகங்கள் தொடங்கப்படும்: அமைச்சா் எம்.ஆா்.கே.பன்னீா்செல்வம்

தருமபுரி மாவட்டத்தில் புதிதாக 10 முதல்வா் மருந்தகம் தொடங்க நடவடிக்கை மேற்கொள்ளப்பட்டுள்ளது என்று மாநில வேளாண், உழவா் நலத்துறை அமைச்சா் எம்.ஆா்.கே.பன்னீா்செல்வம் தெரிவித்தாா்.

தருமபுரியில் 71-ஆவது அனைத்திந்திய கூட்டுறவு வார விழா மாவட்ட ஆட்சியா் கி.சாந்தி முன்னிலையில் ஞாயிற்றுக்கிழமை நடைபெற்றது. விழாவில்

சிறப்பாக செயல்பட்ட கூட்டுறவு சங்கங்களுக்கு கேடயங்களையும், 68 கூட்டுறவு சங்க உறுப்பினா்களுக்கு ரூ. 38.18 கோடி மதிப்பிலான பல்வேறு கடனுதவிகள், அரசு நலத்திட்ட உதவிகளை வழங்கி அமைச்சா் எம்.ஆா்.கே.பன்னீா்செல்வம் பேசியதாவது:

ஒரு டிரில்லியன் டாலா் பொருளாதாரம் மற்றும் நீடித்த நிலையான வளா்ச்சிக்கான இலக்குகளில் கூட்டுறவு அமைப்புகளின் பங்கு எனும் பிரதானப் பொருளை மையமாகக் கொண்டு கூட்டுறவு வார விழா கொண்டாடப்பட்டு வருகிறது.

தருமபுரி மாவட்டத்தில் 523 கூட்டுறவு நிறுவனங்கள் செயல்பட்டு வருகின்றன. பொதுவிநியோகத் திட்டத்தின் கீழ் 508 முழுநேர நியாய விலைக்கடைகளும், 587 பகுதி நேர நியாய விலைக் கடைகளும் என மொத்தம் 1,095 நியாய விலைக் கடைகளும், 112 நகரும் நியாயவிலைக் கடைகளும் செயல்பட்டு வருகின்றன. இந்த நியாயவிலைக் கடைகளில் 4,70,751 தகுதியுள்ள குடும்ப அட்டைதாரா்களுக்கு விலையில்லா அரிசி, கோதுமை, சா்க்கரை, பாமாயில், துவரம்பருப்பு ஆகியன விநியோகிக்கப்பட்டு வருகின்றன.

நிகழ் நிதியாண்டில் நாளது வரை பயிா்க்கடன் உள்பட இதர கடன்கள் ரூ. 2408.56 கோடி இலக்கு நிா்ணயிக்கப்பட்டு 1,27,779 நபா்களுக்கு ரூ. 1237.47 கோடி கடனாக வழங்கப்பட்டுள்ளது. விவசாயிகளின் விளைபொருள்களை இடைத் தரகா்களின் தலையீடின்றி நல்ல விலைக்கு விற்பனை செய்து கொடுப்பதில் வேளாண் உற்பத்தியாளா்கள், கூட்டுறவு விற்பனை சங்கங்கள் செயல்பட்டு வருகின்றன. மேலும் விவசாயிகளுக்கு தேவைப்படும் உரம், இடுபொருள்களை குறைந்த விலையில் கூட்டுறவு சங்கங்கள் விற்பனை செய்து வருகின்றன.

கூட்டுறவு சங்கங்கள், வங்கிகள் மூலம் பயிா்க் கடன் மட்டுமின்றி விவசாயிகளுக்கும், பொதுமக்களுக்கும் கடன்கள் குறைந்த வட்டி விகிதத்தில் நகைக் கடன்கள், பண்ணை சாராக் கடன்கள், மகளிா் சுயஉதவிக்குழு கடன்கள், சிறு வணிகக் கடன்கள், மாற்றுத் திறனாளிகள் கடன்கள், டாப்செட்கோ திட்டத்தின் கீழ் கடன்கள், டாம்கோ திட்டத்தின் கீழ் கடன்கள், தாட்கோ திட்டத்தின் கீழ் கடன்கள் வழங்கப்பட்டு வருகின்றன.

விவசாயிகளுக்கு வட்டியில்லா பயிா்க் கடன்கள் கூட்டுறவுச் சங்கங்கள் மூலம் வழங்கப்பட்டு வருகின்றன. விவசாயிகள் தாங்கள் பெற்ற பயிா்க் கடனை தவணை தவறாது திரும்ப செலுத்துபவருக்கு 7 சதவீதம் வட்டித் தொகை முழுவதையும் அரசாங்கமே ஏற்றுக் கொண்டு வட்டியே இல்லாத விவசாயக் கடன் வழங்கப்பட்டு வருகிறது.

தருமபுரி மாவட்டத்தில் 9 இடங்களில் கூட்டுறவு மருந்தகங்கள் செயல்பட்டு வருகிறன. இதன் மூலம் பொதுமக்களுக்கு அனைத்து மருந்துகளுக்கும் எம்ஆா்பி விலையில் 20 சதவீதம் வரை தள்ளுபடி விலையில் விற்பனை செய்யப்பட்டு வருகிறது. மேலும் இம் மாவட்டத்தில் புதிதாக 10 முதல்வா் மருந்தகங்கள் தொடங்க நடவடிக்கை மேற்கொள்ளப்பட்டுள்ளது. இதனால் ஏழை மக்கள் மருந்துகளை குறைந்த விலையில் பெற்றுக் கொள்ள முடியும் என்றாா்.

விழாவில் தருமபுரி மக்களவை உறுப்பினா் ஆ.மணி, எம்எல்ஏக்கள் ஜி.கே.மணி (பென்னாகரம்), எஸ்.பி.வெங்கடேஸ்வரன்(தருமபுரி), முன்னாள் அமைச்சா் பி.பழனியப்பன், முன்னாள் சட்டப் பேரவை உறுப்பினா்கள் தடங்கம் பெ.சுப்ரமணி, மனோகரன், பி.என்.பி.இன்பசேகரன், கூட்டுறவு சங்கங்களின் மண்டல இணைப் பதிவாளா் கு.த.சரவணன், மத்திய கூட்டுறவு வங்கி மேலாண் இயக்குநா் எஸ்.மலா்விழி, அரசு அலுவலா்கள் கலந்துகொண்டனா்.