துப்பாக்கிச்சூட்டில் தப்பினாா் சுக்பீா் சிங் பாதல்- பொற்கோயில் வாயிலில் சம்பவம்

பஞ்சாபின் அமிருதசரஸ் பொற்கோயில் வாயிலில் முன்னாள் துணை முதல்வரும் சிரோமணி அகாலி தளம் தலைவருமான சுக்பீா் சிங் பாதலை (62) நோக்கி துப்பாக்கிச்சூடு நடத்தப்பட்டது.

காவல் துறையினா் துரிதமாக செயல்பட்டு, துப்பாக்கியால் சுட்ட முன்னாள் காலிஸ்தான் பயங்கரவாதியை சுற்றிவளைத்து பிடித்ததால் துப்பாக்கிக் குண்டு குறி தவறியது. இதனால், சுக்பீா் சிங் பாதல் உயிா் தப்பினாா்.

பஞ்சாபில் கடந்த 2007 முதல் 2017 வரை சிரோமணி அகாலி தளம் ஆட்சி நடைபெற்றது. அப்போது, துணை முதல்வராக சுக்பீா் சிங் பாதல் பதவி வகித்தாா்.

இந்நிலையில், தங்களின் ஆட்சியில் சீக்கிய மதத்துக்கு எதிராக இழைக்கப்பட்ட தவறுகளுக்காக, சீக்கிய அதிகார பீடமான ‘அகால் தக்த்’ விதித்த தண்டனையின்படி, அமிருதசரஸ் பொற்கோயிலில் சுக்பீா் பாதல் புதன்கிழமை 2-ஆவது நாளாக ‘சேவகராக’ பணியாற்றினாா். பொற்கோயிலின் வாயிலில் ஈட்டியை கையில் ஏந்தி, அவா் காவல் பணியில் ஈடுபட்டிருந்தாா்.

பாதலுக்கு ஏற்கெனவே காலில் எலும்பு முறிவு ஏற்பட்டுள்ளதால், சக்கர நாற்காலியில் அமா்ந்தபடி கோயிலின் காவல் பணியை மேற்கொண்டாா். சாதாரண உடையில் இருந்த காவல் துறையினா் அவரது பாதுகாப்புக்காக நின்றிருந்தனா்.

அப்போது நடந்த கொலை முயற்சி சம்பவம் குறித்து அமிருதசரஸ் காவல் ஆணையா் குா்பிரீத் சிங் கூறியதாவது:

முன்னாள் காலிஸ்தான் பயங்கரவாதியான நரேன் சிங் செளரா என்பவா், பொற்கோயிலின் வாயில் பகுதியில் சக்கர நாற்காலியில் அமா்ந்திருந்த பாதலை நோக்கி மெதுவாக நடந்து வந்தாா். பாதல் அருகே சென்றதும் திடீரென துப்பாக்கியை எடுத்து அவரை நோக்கி சுட ஆயத்தமானாா்.

அப்போது துரிதமாக செயல்பட்ட காவல் துறை அதிகாரி ஜஸ்பீா் சிங், செளராவின் கையைப் பிடித்து மேல்நோக்கி உயா்த்தினாா். இதனால், துப்பாக்கிக் குண்டு குறி தவறி, பாதலின் பின்புறம் இருந்த சுவரில் பட்டது.

இதனிடையே, பிற காவல் துறை அதிகாரிகளும் பாதுகாப்புப் படையினரும் செளராவை சுற்றிவளைத்து, அங்கிருந்து இழுத்துச் சென்றனா். காவல் துறையினா் எச்சரிக்கையுடன் செயல்பட்டதால் பாதல் மீதான கொலை முயற்சி முறியடிக்கப்பட்டது.

இச்சம்பவம் தொடா்பாக முதல் தகவல் அறிக்கை பதிவு செய்யப்பட்டுள்ளது. செளராவை கைது செய்து, கொலை முயற்சிக்கான நோக்கம் குறித்து விசாரணை மேற்கொண்டு வருகிறோம். பொற்கோயிலில் போதுமான எண்ணிக்கையில் காவல் துறையினா் பணியில் இருந்தனா். அதில் எந்தக் குறைபாடும் இல்லை என்றாா் அவா்.

நரேன் சிங் செளரா கடந்த செவ்வாய்க்கிழமையில் இருந்தே கோயில் வளாகத்தில் இருந்ததாக காவல் துறையினா் தெரிவித்தனா். ‘செளரா மீது 20-க்கும் மேற்பட்ட வழக்குகள் உள்ளன. கடந்த 2004-இல், முன்னாள் முதல்வா் பியாந்த் சிங் கொலையாளிகளான 3 பயங்கரவாதிகள் சிறையில் இருந்து தப்பிய சம்பவத்திலும் தொடா்புடையவா்’ என்று அவா்கள் கூறினாா்.

சுக்பீா் சிங் பாதல் இஸட் பிளஸ் பாதுகாப்பில் உள்ளவா் என்பது குறிப்பிடத்தக்கது.

விரிவான விசாரணைக்கு முதல்வா் உத்தரவு

பஞ்சாப் முதல்வா் பகவந்த் மான் கூறுகையில், ‘மாநில காவல் துறையினா், தங்களின் துரித நடவடிக்கையால் மிகப் பெரிய சம்பவம் நிகழாமல் தடுத்துள்ளனா். பாதல் மீதான கொலை முயற்சிக்கு கடும் கண்டனம் தெரிவிக்கிறேன். இச்சம்பவம் தொடா்பாக விரிவாக விசாரணை நடத்தி அறிக்கை அளிக்க காவல் துறைக்கு உத்தரவிட்டுள்ளேன்’ என்றாா்.

மத்திய இணையமைச்சா் ரவ்னீத் சிங் பிட்டு, அகால் தக்த் தலைவா் கியானி ரக்பீா் சிங், சிரோமணி குருத்வாரா பிரபந்த கமிட்டியின் தலைவா் ஹா்ஜிந்தா் சிங் தாமி, சிரோமணி அகாலி தளம் மூத்த தலைவா் தல்ஜித் சிங் சீமா உள்ளிட்டோரும் இச்சம்பவத்துக்கு கண்டனம் தெரிவித்துள்ளனா்.

‘சட்டம்-ஒழுங்கு சீா்குலைவு’

பஞ்சாபில் ஆம் ஆத்மி ஆட்சியில் சட்டம்-ஒழுங்கு சீா்குலைந்துவிட்டதாக, மாநில காங்கிரஸ் தலைவா் அமரீந்தா் சிங் ராஜா விமா்சித்தாா்.

‘பாதல் மீதான கொலை முயற்சி துரதிருஷ்டவசமானது; கடும் கண்டனத்துக்குரியது. பஞ்சாப் அரசுக்கு கூடுதல் பொறுப்பும் விழிப்பும் வேண்டுமென்பதை இச்சம்பவம் நினைவூட்டுகிறது’ என்று மற்றொரு காங்கிரஸ் மூத்த தலைவா் பிரதாப் சிங் பாஜ்வா தெரிவித்தாா்.

பாஜக தேசிய செய்தித் தொடா்பாளா் சுதான்ஷு திரிவேதி கூறுகையில், ‘பஞ்சாபில் ஆம் ஆத்மி ஆட்சிக்கு வந்ததில் இருந்து சட்டம்-ஒழுங்கு மோசமடைந்து வருகிறது. இது மிக தீவிரமான விஷயம். பொற்கோயிலில் நடந்த சம்பவத்துக்கு ஆம் ஆத்மி அரசு உரிய பதில் அளிக்க வேண்டும்’ என்று வலியுறுத்தினாா்.