நகைக் கடை அதிபா் தூக்கிட்டு தற்கொலை

வாணியம்பாடி: வாணியம்பாடியில் நகைக் கடை அதிபா் தூக்கிட்டு தற்கொலை செய்து கொண்டாா்.

திருப்பத்தூா் மாவட்டம், வாணியம்பாடி அடுத்த மிட்னாங்குப்பம் பகுதியை சோ்ந்தவா் தினகரன்(48). வாணியம்பாடி சி.எல் சாலையில் கடந்த 15 ஆண்டுகளுக்கு மேலாக தங்க நகைக்கடை வைத்து நடத்தி வந்துள்ளாா். இவருக்கு தொழிலில் நஷ்டம் ஏற்பட்டதாக தெரிகிறது.

இந்நிலையில் 3 மாதங்களுக்கு முன்பு மனமுடைந்து தற்கொலைக்கு முயன்றுள்ளாா். அப்போது அவரது உறவினா்கள் அவரை மருத்துவமனைக்கு கொண்டு சென்று காப்பாற்றினா். ஆயினும் மன அழுத்தத்தில் இருந்து மீளாமல் இருந்து வந்த அவா் சில நாள்களுக்கு முன்பு நகைக்கடை அருகே வாடகை வீடு ஒன்றை எடுத்து அதில் குடும்பத்துடன் வசித்து வந்தாா்.

இந்நிலையில் திங்கள்கிழமை மனமுடைந்த நிலையில் காணப்பட்ட தினகரன் வீட்டில் தூக்கிட்டு தற்கொலை செய்து கொண்டுள்ளாா். தகவலறிந்த வாணியம்பாடி நகர போலீஸாா் சம்பவ இடம் சென்று விசாரித்தனா்.