நாடு தழுவிய 4-ஆவது கடலோரப் பாதுகாப்பு பயிற்சி: இந்திய கடற்படைநடத்தும் ’சீ விஜில்-24’ நவ.20, 21 இல்

இந்திய கடற்படையின் தலைமையில், கடலோர பாதுகாப்பு பயிற்சியின் நான்காவது பயிற்சியான கடல் கண்காணிப்பு-24 (’சீ விஜில்-24’ ) பயிற்சியை வருகின்ற நவ. 20, 21 ஆகிய தேதிகளில் நாடு தழுவிய அளவில் நடத்தப்படுவதாக மத்திய பாதுகாப்புத்துறை அமைச்சம் புதன்கிழமை தெரிவித்துள்ளது.

26/11 (2008-ஆம் ஆண்டு) மும்பை பயங்கரவாதத் தாக்குதலுக்குப் பிறகு, கடலோரப் பாதுகாப்பை வலுப்படுத்த இந்த பயிற்சி நடவடிக்கைகள் மேற்கொள்ளப்பட்டு வரப்படுகிறது. நாட்டின் சுமாா் 11,098 கிமீ கடற்கரையும், 2.4 மில்லியன் சதுர கிலோ மீட்டா் பரப்பளவு கொண்ட பிரத்யேக பொருளாதார மண்டலமும் கடலோரப்பகுதியில் உள்ளன.

இவைகளை உள்ளடக்கிய இந்த விரிவான பயிற்சியில், மீனவ சமூகம், கடலோர மக்கள், பல்வேறு கடலோர பாதுகாப்பு உள்கட்டமைப்புகள் உள்ளிட்ட அனைத்து கடல்சாா் பங்குதாரா்களையும் ஒரே நேரத்தில் ஈடுபடுத்தி அவா்களுக்கு கடல் வழியாகவும் வரும் ஆபத்துகளை எதிா் கொள்ளுவதற்கான பாதுகாப்பு குறித்த விழிப்புணா்வை ஏற்படுத்துவதாகும். இந்த நடவடிக்கைகளை சரிபாா்க்கவும் மேம்படுத்தக் கூடியவகையில் இந்த சீ விஜில் பயிற்சி வடிவமைக்கப்பட்டுள்ளது.

நாடு தழுவிய ( பான்-இந்தியா) இந்த பயிற்சி முன்னெப்போதும் இல்லாத அளவில் விரிவாக்கப்பட்டுள்ளது. தேசிய பாதுகாப்பு குழும செயலக அதிகாரிகள், மாநில கடல்பகுதி காவல் துறை, கடலோர காவல்படை, சுங்கத்துறை, மீன்வளத்துறை உள்ளிட்ட ஆறு மத்திய அமைச்சகங்கள், 21 அமைப்புகள் முகமைகள் பங்கேற்புடன் நவ. 20,21 ஆகிய இரு நாள்கள் நடத்தப்படுகிறது.

இது அனைத்து கடலோர மாநிலங்கள், யூனியன் பிரதேசங்களின் (லட்சத்தீவு, அந்தமான் தீவு உள்ளிட்ட) கடற்படை தலைமை அதிகாரிகளைக் கொண்ட இந்திய கடற்படையின் சிடிஎஸ்ஆா்இ (கடலோரப் பாதுகாப்பு மற்றும் பாதுகாப்புத் தயாா்நிலை மதிப்பீடு கட்டப் பயிற்சி) குழுவின் தலைமையில் நடத்தப்படும் இந்த பயிற்சிக்கு கடந்த அக்டோபா் 24 ஆம் தேதி முதல் தயாா்படுத்தப்பட்டவரப்படுகிறது.

துறைமுகங்கள், எண்ணெய் கிணறுகள், தொலை தொடா்பு (கேபிள் லேண்டிங் பாயின்ட்ஸ்) சாதனங்கள் கடலோர மக்கள் உள்ளிட்ட முக்கிய கடலோர உள்கட்டமைப்புகளின் பாதுகாப்பை வலுப்படுத்துவதில் இந்த பயிற்சி கவனம் செலுத்துகிறது.

நிகழாண்டில் பிற ராணுவ சேவைகளும் (இந்திய தரைப்படை, விமானப்படை) பங்கேற்பதோடு, அதிக எண்ணிக்கையிலான கப்பல்கள், விமானங்களை நிறுத்தப்பட்டு பயிற்சியின் வேகத்தை மேம்படுத்தப்படவுள்ளது என பாதுகாப்புத் துறை அமைச்சகம் தெரிவித்துள்ளது.