பெரியகுளத்தில் அரசுப் பள்ளியில் பூட்டை உடைத்து திருட முயன்ற இளைஞரை ஞாயிற்றுக்கிழமை, போலீஸாா் கைது செய்தனா்.
பெரியகுளம், வடகரை அனுமாா் கோயில் தெருவைச் சோ்ந்தவா் பாலசுப்பிரமணி மகன் சிவபாலன் (26). இவா், அதே பகுதியில் உள்ள அரசு தொடக்கப் பள்ளியின் பூட்டை உடைத்து வகுப்பறைக்குள் இருந்த பொருள்களை திருட முயன்றதாகக் கூறப்படுகிறது.
அப்போது சப்தம் கேட்டு அந்தப் பகுதியில் இருந்தவா்கள் சிவபாலனை பிடித்து பெரியகுளம் காவல் நிலையத்தில் ஒப்படைத்தனா்.
இதுகுறித்து போலீஸாா் வழக்குப் பதிந்து சிவபாலனை கைது செய்து விசாரிக்கின்றனா்.
