பாக். முன்னாள் பிரதமர் இம்ரான் கானுக்கு ஜாமீன்!

இஸ்லாமாபாத்: இம்ரான் கான் சிறையிலிருந்து விடுவிக்கப்படுவாரா? அல்லது அவர் எப்போது விடுவிக்கப்படுவார்? என்று அவரது பிடிஐ கட்சித் தொண்டர்கள் எதிர்பார்த்துக் காத்திருக்கும் நிலையில், இன்று(நவ. 20) இம்ரான் கானுக்கு ஜாமீன் வழங்கப்பட்டுள்ளது.

அரசு கஜானாவுக்கு நிதி இழப்பை ஏற்படுத்தியதாக பதியப்பட்டுள்ள ‘டோஷாகானா’ வழக்கில் இஸ்லாமாபாத் உயர் நீதிமன்றத்தால் இம்ரான் கானுக்கு இன்று ஜாமீன் வழங்கப்பட்டுள்ளது. எனினும் நிபந்தனையாக, மொத்தம் 2 ஒப்பந்தங்களின்படி தலா 1 ஒப்பந்தத்துக்கு, பாகிஸ்தான் ரூபாய் 1 மில்லியன் தொகை செலுத்திடவும் உத்தரவிடப்பட்டுள்ளது.

ஜாமீன் அளிக்கப்பட்டாலும், இம்ரான் கான் நீதிமன்ற விசாரணைக்கு மேற்கொண்டு ஒத்துழைக்காவிட்டால், ஜாமீன் உத்தரவு திருப்பி பெறப்படுமெனவும் நீதிமன்றம் எச்சரித்துள்ளது.

72 வயதான இம்ரான் கான் பிரதமராக பதவி வகித்த போது, பல்வேறு மோசடிகளில் ஈடுபட்டதாக அவர் மீது பதியப்பட்டுள்ள குற்றச்சாட்டுகளில் கைது செய்யப்பட்டு, கடந்தாண்டு ஆகஸ்ட் மாதத்திலிருந்து சிறையில் அடைக்கப்பட்டுள்ளார். இந்த நிலையில், தற்போது ஜாமீன் வழங்கப்பட்டாலும் இம்ரான் கான் மீது பிற வழக்குகள் நிலுவையில் இருப்பதால் அவர் சிறையிலிருந்து விடுவிக்கப்படுவாரா என்பதற்கான விடை கேள்விக்குறியாகவே உள்ளது.

முன்னதாக, இதே வழக்கில் கைது செய்யப்பட்ட இம்ரான் கானின் மனைவி புஷ்ரா பீபிக்கும், கடந்த அக்டோபர் 24-ஆம் தேதி இதே நீதிமன்றத்தால் ஜாமீன் வழங்கப்பட்டதும் குறிப்பிடத்தக்கது. இதனைத் தொடர்ந்து அவர் சிறையிலிருந்து உடனடியாக விடுவிக்கப்பட்டார்.