தீபாவளிப் பண்டிகையையொட்டி, புதுக்கோட்டையில் வெள்ளிக்கிழமை நடைபெற்ற ஆட்டுச்சந்தையில் சுமாா் ரூ. 2 கோடிக்கு விற்பனை நடைபெற்றிருக்கலாம் என வியாபாரிகள் தெரிவித்தனா்.
புதுக்கோட்டை மாநகராட்சிக்கு உட்பட்ட சந்தைப்பேட்டையில் வாரந்தோறும் வெள்ளிக்கிழமை ஆட்டுச்சந்தை நடைபெறும். இந்த ஆட்டுச் சந்தையில் புதுக்கோட்டை மாவட்டம் மட்டுமின்றி பல்வேறு மாவட்டங்களிலிருந்தும் ஆடுகளை விற்கவும், வாங்கவும் ஏராளமான விவசாயிகள் மற்றும் வியாபாரிகள் வந்து செல்கிறாா்கள்.
இந்நிலையில், வெள்ளிக்கிழமை நடைபெற்ற ஆட்டுச் சந்தை தீபாவளி பண்டிகையை முன்னிட்டு களைகட்டியது. ஆடுகளின் வரத்து அதிகரித்திருந்த நிலையில் ஆடு ஒன்றுக்கு எடைக்கு தகுந்தாற்போல் ரூ. 500 முதல் ரூ. ஆயிரம் வரை விலை அதிகரித்திருந்தது. ஒரேநாளில் சுமாா் ரூ. 2 கோடிக்கு விற்பனை நடைபெற்ாக வியாபாரிகள் தெரிவித்தனா்.
அடுத்த வாரம் வியாழக்கிழமையே தீபாவளி பண்டிகை வருவதால், அந்த வாரத்துக்கான ஆட்டுச்சந்தையை புதன்கிழமையே (அக். 30) நடத்தவும் முடிவு செய்யப்பட்டு மாநகராட்சி சாா்பில் அறிவிக்கப்பட்டுள்ளது.
