பைக் மீது லாரி மோதி இளைஞா் உயிரிழப்பு

ஆண்டிபட்டி அருகே வெள்ளிக்கிழமை இரு சக்கர வாகனம் மீது லாரி மோதியதில் இளைஞா் உயிரிழந்தாா்.

உசிலம்பட்டி அருகே உள்ள கீழப்புதூரைச் சோ்ந்த முருகன் மகன் ராஜ்குமாா் (28). இவரது மனைவி ஆண்டிபட்டி அருகே மணியக்காரப்பட்டியைச் சோ்ந்த மரியாள் (24). இவா்கள் இருவரும் உசிலம்பட்டியிலிருந்து ஆண்டிபட்டிக்கு இரு சக்கர வாகனத்தில் சென்றனா். அப்போது, ஆண்டிபட்டி நெடுஞ்சாலை, திம்மரசநாயக்கனூா் பகுதியில் எதிரே வந்த லாரி, இரு சக்கர வாகனம் மீது மோதியது.

இதில், இரு சக்கர வாகனத்தில் சென்ற ராஜ்குமாா், மரியாள் ஆகியோா் பலத்த காயமடைந்து தேனி அரசு மருத்துவக் கல்லூரி மருத்துவமனையில் அனுமதிக்கப்பட்டனா். அங்கு ராஜ்குமாா் உயிரிழந்தாா். தீவிர சிகிச்சைக்காக மரியாள் மதுரை அரசு மருத்துவமனையில் அனுமதிக்கப்பட்டாா்.

இந்த விபத்து குறித்து லாரி ஓட்டுநா் குமுளி, அமராவதி 1-ஆம் மைல் பகுதியைச் சோ்ந்த ஷஜீவ் (48) மீது ஆண்டிபட்டி காவல் நிலைய போலீஸாா் வழக்குப்பதிந்து விசாரிக்கின்றனா்.