பொங்கல் பண்டிகையையும் திமுகவையும் பிரிக்க முடியாது: முதல்வா் மு.க.ஸ்டாலின்

பொங்கல் பண்டிகையையும் திமுகவையும் பிரிக்க முடியாது என்று முதல்வா் மு.க.ஸ்டாலின் கூறினாா்.

சென்னை கொளத்தூா் தொகுதியில் சனிக்கிழமை நடைபெற்ற பொங்கல் விழாவில் பங்கேற்று முதல்வா் பேசியதாவது:

எத்தனை நிகழ்ச்சிகளில் கலந்துகொண்டாலும், எனது கொளத்தூா் தொகுதி மக்களுடன் கலந்துகொள்ளும் நிகழ்ச்சி எனக்கு எப்போதுமே தனித்துவமானது. அதுவும் தமிழா்களின் தனிப்பெரும் விழாவான பொங்கல் திருநாளை உங்களுடன் சோ்ந்து கொண்டாடுவதைவிட வேறென்ன மகிழ்ச்சி இருக்க முடியும்?.

பொங்கலையும் திமுகவையும் பிரிக்க முடியாது. திராவிட இயக்கம் மிக உற்சாகத்துடன் கொண்டாடும் ஒரு திருநாள் என்றால் அது பொங்கல் திருநாள்தான். ஏனென்றால், இதில் மதம், ஜாதி, வன்முறை இல்லை. உழைப்பைப் போற்றும் தத்துவம்தான் இருக்கிறது. சமத்துவம் இருக்கிறது. தமிழா்களின் பண்பாடும், வீரமும், கொண்டாட்டமும் நிறைந்த விழா பொங்கல் விழா.

கருணாநிதி ஆட்சிக் காலத்தில், தை மாத பிறப்பில் இருந்து திருவள்ளுவா் ஆண்டுக் கணக்கு தொடக்கம், பொங்கல் இரண்டாம் நாள் திருவள்ளுவா் நாளாக அறிவிப்பு எனப் பொங்கல் பண்டிகையை சிறப்பிக்க பல முயற்சிகளை எடுத்தாா்.

நிகழாண்டு, பொங்கல் திருநாளை தமிழ்நாட்டு மக்கள் அனைவரும் சிறப்பாக, சொந்த ஊா்களில் குடும்பத்தோடும் நண்பா்களோடும் ஒன்றாகச் சோ்ந்து கொண்டாட வேண்டும் என வரும் 17-ஆம் தேதி ஒருநாள் கூடுதலாக அரசு விடுமுறை அறிவிக்கப்பட்டுள்ளது என்றாா் முதல்வா்.

நிகழ்வில், அமைச்சா் பி.கே.சேகா்பாபு, சென்னை மாநகராட்சி மேயா் ஆா்.பிரியா உள்பட பலா் பங்கேற்றனா்.

முருகன் பாடலை ரசித்த முதல்வா்.... கொளத்தூரில் சனிக்கிழமை நடைபெற்ற பொங்கல் விழாவில் தனது மனைவி துா்காவுடன் முதல்வா் மு.க.ஸ்டாலின் பங்கேற்றாா். அப்போது கலைநிகழ்ச்சிகளுக்கு ஏற்பாடு செய்யப்பட்டிருந்தது. அதில் ‘குன்றத்திலே குமரனுக்கு கொண்டாட்டம்’ எனத் தொடங்கும் முருகன் பாடலை சிறுமி ஒருவா் பாடுகையில், முதல்வா் மு.க.ஸ்டாலின் கேட்டு ரசித்தாா்.