மத்திய, மாநில அரசின் வரி உயா்வைக் கண்டித்து பரமத்தி வேலூரில் முழு கடையடைப்பு போராட்டம்

பரமத்தி வேலூரில் மத்திய அரசின் சேவை வரி மற்றும் மாநில அரசின் கடை உரிமக் கட்டணம், தொழில் வரி, சொத்து வரி உயா்வைக் கண்டித்து வெள்ளிக்கிழமை முழு கடை அடைப்பு போராட்டம் நடைபெற்றது.

டிச. 1-ஆம் தேதி முதல் கடைகளின் வாடகைக்கு 18 சதவீதம் ஜி.எஸ்.டி. வரி செலுத்த வேண்டும் என மத்திய அரசு அறிவித்துள்ளது. இந்த சேவை வரியை மத்திய அரசு கைவிட வேண்டும். மாநில அரசின் பேரூராட்சி நிா்வாகம் சாா்பில் 2025-2026-ஆம் ஆண்டு முதல் அமல்படுத்த உள்ள கடை உரிமக் கட்டணம், தொழில் வரி, சொத்து வரி உயா்வைக் கைவிட வேண்டும் என்பதை வலியுறுத்தி வெள்ளிக்கிழமை காலை 6 மணி முதல் மாலை 6 மணி வரை ஒரு நாள் முழு கடை அடைப்பு போராட்டம் நடைபெற்றது. இதில், மருந்தகம், பால், உணவகங்கள் உள்ளிட்ட அத்தியாவசியக் கடைகளைத் தவிர மற்ற அனைத்துக் கடைகளும் முழுமையாக மூடப்பட்டிருந்தன. இதனால் பொதுமக்களின் இயல்பு வாழ்க்கை பாதிக்கப்பட்டது.

மத்திய, மாநில அரசின் வரிவிதிப்பால் சிறு, குறு வணிகா்கள் உள்பட அனைத்து வணிகா்களும் பொருளாதார ரீதியாக பெரிதும் பாதிப்புக்குள்ளாக நேரிடுவா். இந்த கடையடைப்பு போராட்டத்தில் வேலூா் நகர அனைத்து வா்த்தக சங்கம், அனைத்து சிறு வணிகா்கள் சங்கம், சிமென்ட், இரும்பு, மரம், எலக்ட்ரிக்கல் சங்கம், ஹோட்டல் மற்றும் பேக்கரி வியாபாரிகள் சங்கம், தங்கம், வெள்ளி நகை வியாபாரிகள் சங்கம், பாத்திரக்கடை வியாபாரிகள் சங்கம், பரமத்தி வேலூா் தாலுகா மருந்து வணிகா்கள் சங்கம், தமிழ்நாடு சிமென்ட் ஆா்ட்டிகல்ஸ் மற்றும் பைப்ஸ் உற்பத்தியாளா்கள் சங்கம், பரமத்தி வேலூா் தாலுகா நுகா்ப்பொருள் விநியோகஸ்தா்கள் சங்கம், கணினி மையங்கள், ஜெராக்ஸ் கடைகள், துணிக் கடைகள், புகைப்படக் கலைஞா்கள் முழு ஆதரவு தெரிவித்து கடைகளை பூட்டி இருந்தனா்.

முழு கடையடைப்புக்கு அதிமுக சாா்பில் பரமத்தி வேலூா் தொகுதி சட்டப் பேரவைத் தொகுதி உறுப்பினா் எஸ்.சேகா் மற்றும் பாமகவினா் ஆதரவு தெரிவித்திருந்தனா்.