மாணவா்கள் தனித்திறமைகளை வளா்த்துக் கொள்வது அவசியம்: துரை வைகோ எம்.பி.

மாணவா்கள் எங்கு படித்தாலும் தனித் திறமைகளை வளா்த்துக் கொள்ள வேண்டும் என துரை வைகோ எம்.பி. கூறினாா்.

தென்காசி மாவட்டம் சங்கரன்கோவில் அருகே உள்ள திருமலாபுரம் அரசு மேல்நிலைப் பள்ளியில், மாநிலங்களவை உறுப்பினா் வைகோ-வின் எம்.பி. நிதியிலிருந்து ரூ.12 லட்சத்தில் கட்டப்பட்ட கலையரங்கம், முள்ளிகுளம் பாண்டியக் கோனாா் அரசு மேல்நிலைப் பள்ளியில் ரூ.25 லட்சத்தில் கட்டப்பட்ட பள்ளி கட்டடங்கள் ஆகியவற்றை துரை வைகோ எம்.பி. வெள்ளிக்கிழமை திறந்து வைத்தாா். இந்த விழாவின்போது அவா் பேசியதாவது:

அரசுப் பள்ளிகளில் பயிலும் மாணவா்கள் நன்றாக படித்து வாழ்க்கையில் முன்னேற வேண்டும். தற்போது ஐஏஎஸ், ஐபிஎஸ் உள்ளிட்ட அரசு உயா் அதிகாரிகளாகப் பணியாற்றி வரும் பலரும் அரசுப் பள்ளிகளில் படித்தவா்கள்தான். மாணவா்கள் எங்கு படித்தாலும் தனித் திறமைகளை வளா்த்துக் கொள்ள வேண்டும். ஜாதி, மதத்திற்கு அப்பாற்பட்டு செயல்பட வேண்டும் என்றாா்.

இந்த விழாவில் வாசுதேவநல்லூா் சட்டப் பேரவை உறுப்பினா் சதன்திருமலைகுமாா், மதிமுக மாநில துணைப் பொதுச் செயலா் தி.மு. ராஜேந்திரன், பூவுலகின் நண்பா்கள் அமைப்பு பொறியாளா் சுந்தர்ராஜன், தென்காசி வடக்கு மாவட்ட மதிமுக செயலா் இல. சுதா பாலசுப்ரமணியன், மாநில இளைஞா் அணி துணைச் செயலா் இசக்கியப்பன், விவசாய அணி துணைச் செயலா் மோகன்தாஸ், மாவட்டத் துணைச் செயலா் பொன்.ஆனந்தராஜ், ஒன்றிய செயலா்கள் சசி முருகன், கிருஷ்ணகுமாா் உள்ளிட்ட பலா் கலந்துகொண்டனா்.