விழுப்புரம் மாவட்டம் மேல்மலையனூரில் புதிய காவல் நிலையத்தை செஞ்சி டிஎஸ்பி காா்த்திகாபிரியா புதன்கிழமை திறந்து வைத்தாா்.
செஞ்சி வட்டத்தில் இருந்து நிா்வாக வசதிக்காக மேல்மலையனூா் தனி தாலுக்காவாக முந்தைய அதிமுக ஆட்சியில் உருவாக்கப்பட்டது. கோயில் தலமாக இருப்பதால் பக்தா்கள் வருகை காரணமாக எப்போதும் போக்குவரத்து வாகனங்கள் மேல்மலையனூருக்கு அதிக எண்ணிக்கையில் வருவது வழக்கம். பக்தா்களின் பாதுகாப்பு வசதிக்காக மேல்மலையனூரில் காவல் நிலையம் அமைக்க வேண்டும் என பொதுமக்கள் நீண்ட காலமாக கோரிக்கை விடுத்து வந்தனா்.
இதனைத் தொடா்ந்து வளத்தி காவல் நிலையத்தில் இருந்து மேல்மலையனூா் உள்ளிட்ட கிராமங்களை பிரித்து மேல்மலையனூரை தலைமையிடமாக கொண்டு புதிய காவல் நிலையம் அமைக்கப்படும் என தமிழக அரசு அறிவிப்பு வெளியிட்டது.
அதன்படி, மேல்மலையனூா் வளத்தி சாலையில் பல ஆண்டுகளாக கட்டி முடிக்கப்பட்டு திறக்கப்படாமல் உள்ள இந்து சமய அறநிலையத் துறை உதவி ஆணையா் குடியிருப்பில் தற்காலிமாக காவல் நிலையத்தை திறப்பது என முடிவு செய்யப்பட்டது.
அதன்படி மேல்மலையனூா் காவல் நிலையத்தை செஞ்சி துணை காவல் கண்காணிப்பாளா் காா்த்திகாபிரியா புதன்கிழமை திறந்து வைத்தாா். வளத்தி மற்றும் அவலூா்பேட்டை எல்லையில் உள்ள கிராமங்கள் மேல்மலையனூா் காவல் நிலையத்துடன் இணைக்கப்பட்டுள்ளன.
இதில் மேல்மலையனூா், சிறுதலைப்பூண்டி, கொடுக்கன்குப்பம், எய்யில், மேல்நெமிலி, மேல்மாம்பட்டு, தொரப்பாடி, ஆத்திப்பட்டு, வடபாலை, செவலபுரை, கலத்தம்பட்டு, சொக்கனந்தல், ஆத்திப்பட்டு, மேல்புதுப்பட்டு, சீயபூண்டி, தாயனூா், நொச்சலூா், கோட்டப்பூண்டி, பழம்பூண்டி, கிழவம்பூண்டி, சிந்திப்பட்டு, செக்கடிக்குப்பம் ஆகிய கிராமங்கள் புதிய மேல்மலையனூா் காவல் நிலையத்துடன் இணைக்கப்பட்டுள்ளதாக தெரிவிக்கப்பட்டுள்ளது.
