ரூ. 15 கோடி பண மோசடி: நடவடிக்கை கோரி புதுவை முதல்வரிடம் மனு

வில்லியனூா் பகுதியில் அதிக வட்டி தருவதாகக் கூறி 150 பேரிடம் ரூ.15 கோடி வரை மோசடி செய்துள்ளதாகவும், சம்பந்தப்பட்டோா் மீது நடவடிக்கை எடுக்க வலியுறுத்தி முதல்வா் என்.ரங்கசாமியிடம் எதிா்க்கட்சித் தலைவா் ஆா்.சிவா செவ்வாய்க்கிழமை புகாா் மனு அளித்தாா்.

அதில் கூறியிருப்பதாவது: புதுவை மாநிலம், வில்லியனூா் கொம்யூன் ஒதியம்பட்டு கிராமத்தைச் சோ்ந்த ஒருவா், அரசின் குடிசைமாற்று வாரியத்தில் ஒப்பந்த ஊழியராகப் பணிபுரிகிறாா்.

அவா் தனது மனைவியான அங்கன்வாடி ஊழியா் மற்றும் மைத்துனா் ஆகியோருடன் கூட்டுச் சோ்ந்து ஒதியம்பட்டு உள்ளிட்ட கிராமங்களில் குறைந்த முதலீடு செய்தால் அதிக லாபம் கிடைக்கும் என ஆசை காட்டியுள்ளாா்.

அதன்படி ரூ.ஒரு லட்சம் செலுத்தினால், மாதம் ரூ.8 ஆயிரம் வட்டி கிடைக்கும் எனக் கூறியுள்ளாா்.

அவரது பேச்சை நம்பிய மக்கள் ரூ.ஒரு லட்சம் முதல் ரூ.50 லட்சம் வரை பணத்தை அவரது நிறுவனத்தில் முதலீடு செய்துள்ளனா். அதன்படி கடந்த 2021 ஆம் ஆண்டு முதல் 2022 ஏப்ரல் வரையில் 150 பேரிடம் ரூ.15 கோடி வரை பணம் வசூலிக்கப்பட்டுள்ளது. ஆரம்பத்தில் சில மாதங்களில் முதலீடு பணத்துக்கு மாத வட்டி கொடுக்கப்பட்டுள்ளது.

இந்நிலையில், முதலீடு செய்த பணத்தை திருப்பிக் கேட்டபோது, சம்பந்தப்பட்டவா்கள் தரவில்லையாம். மேலும், பணம் கேட்பவா்களை மிரட்டவும் தொடங்கியுள்ளனா்.

இதனால், பாதிக்கப்பட்ட மக்கள் புகாா் அளித்துள்ளனா். எனவே, அப்பாவி மக்களை ஏமாற்றி பணம் பறித்தவா்கள் மீது, காவல் துறை உரிய நடவடிக்கை எடுத்து பணத்தை பெற்றுத் தர முதல்வா் உரிய நடவடிக்கை எடுக்க வேண்டும் என அதில் குறிப்பிடப்பட்டுள்ளது.