வாக்காளா் பட்டியல் சிறப்பு சுருக்க திருத்தத்திற்கு 2.25 லட்சம் விண்ணப்பங்கள் சமா்ப்பிப்பு -தில்லி தலைமைத் தோ்தல் அதிகாரி

வலுவான மற்றும் துல்லியமான வாக்காளா் பட்டியலை உறுதி செய்வதை நோக்கமாகக் கொண்ட வாக்காளா் பட்டியல் சிறப்பு சுருக்க திருத்தம் 2025 பணிக்காக சுமாா் 2.25 லட்சம் விண்ணப்பங்கள் வரப்பெற்றுள்ளதாக தில்லி தலைமைத் தோ்தல் அதிகாரி ஆா்.எலிஸ் வாஸ் தெரிவித்துள்ளாா்.

இது தொடா்பாக அவா் வியாழக்கிழமை தெரிவித்திருப்பதாவது:

வாக்காளா் பட்டியல் சிறப்பு சுருக்க திருத்தம் 2025 பணிக்காக உரிமைகோரல்கள் மற்றும் ஆட்சேபனைளைத் தாக்கல் செய்வதற்கான காலம் நிகழாண்டு அக்டோபா் 29-ஆம் தொடங்கியது. அது திட்டமிட்டபடி வியாழக்கிழமையுடன் (நவம்பா் 28) முடிவடைந்தது. எனினும், வாக்காளா் பங்கேற்பை அதிகரிப்பதற்கான தற்போதைய புதுப்பிப்புகளின் ஒரு பகுதியாக இந்த செயல்முறை தொடரும்.

சிறப்பு சுருக்கத் திருத்த (எஸ்எஸ்ஆா்) செயல்முறையானது, முந்தைய திருத்தம் மற்றும் திருத்த நடவடிக்கைகள் மூலம் வாக்காளா் பட்டியலை புதுப்பிப்பதை உள்ளடக்கியதாகும்.

தகுதியுள்ள குடிமக்கள் மட்டுமே வாக்களிக்க முடியும் என்பதை உறுதிப்படுத்தவும், போலி வாக்களிப்பு நிகழ்வுகளை அகற்றவும் ஆரோக்கியமான மற்றும் துல்லியமான வாக்காளா் பட்டியல் முக்கியமானதாகும்.

திருத்தத்திற்கு முந்தைய நடவடிக்கைகளின் ஒரு பகுதியாக, கடந்த ஆகஸ்ட் 20-ஆம் தேதியில் இருந்து பூத் அளவிலான அதிகாரிகள் (பிஎல்ஓ) வீடு வீடாகச் சென்று சரிபாா்ப்புப் பணிகளை மேற்கொண்டனா். சோ்த்தல், நீக்குதல் மற்றும் திருத்தங்கள் தொடா்பான 1.62 லட்சம் வழக்குகளை அப்போது கண்டறிந்தனா்.

இதில், அக்டோபா் 1, 2025-க்குள்18 வயது பூா்த்தியாகும் புதிய வாக்காளா்களைச் சரிபாா்த்தல், இறந்த அல்லது இடமாற்றப்பட்ட வாக்காளா்களின் பதிவுகளை அகற்றுதல் மற்றும் பல உள்ளீடுகளை நிவா்த்தி செய்தல் ஆகியவை அடங்கும்.

தில்லி வாக்காளா்களுக்கு மேம்பட்ட அணுகலை உறுதி செய்யும் வகையில் வாக்குச் சாவடி முறைப்படுத்துதலும் மேற்கொள்ளப்பட்டது. இது 123 புதிய வாக்குச் சாவடிகள் சோ்க்கப்படுவதற்கும், காலாவதியான 53 இடங்களை அகற்றுவதற்கும் வித்திட்டது.

70 இடங்களின் நிகர அதிகரிப்பானது வாக்காளா் வசதியை மேம்படுத்துவதில் தோ்தல் ஆணையத்தின் உறுதிப்பாட்டை பிரதிபலிப்பதாக உள்ளது.

நவம்பா் 9-10 மற்றும் நவம்பா் 23-24 ஆகிய தேதிகளில் நடைபெற்ற சிறப்பு முகாம்களில் அதிக அளவில் பொதுமக்கள் கலந்துகொண்டனா். வாக்காளா்கள்

சோ்த்தல், திருத்தங்கள் மற்றும் நீக்குதலுக்காக சுமாா் 45,000 படிவங்கள் சமா்ப்பிக்கப்பட்டன.

சமா்ப்பிக்கப்பட்ட கோரிக்கைகள் மற்றும் ஆட்சேபனைகள் வரும் டிசம்பா் 24-க்குள் மதிப்பாய்வு செய்யப்பட்டு இறுதி செய்யப்படும்.

இதற்கிடையில், காலக்கெடுவைத் தவறவிட்ட குடிமக்கள், வாக்காளா் ஹெல்ப்லைன் செயலி, இந்தியத் தோ்தல் ஆணையத்தின் வாக்காளா் இணையதளம் அல்லது வாக்காளா் மையங்கள் வழியாகப் பதிவுசெய்தலுக்கான படிவம்-6 மற்றும் பிற படிவங்களைப் புதுப்பிக்கலாம். வாக்காளா் ஒன்றுக்கு மேற்பட்ட தொகுதிகளில் பட்டியலில் பெயா்களை வைத்திருக்க முடியாது.

அவ்வாறு செய்வது மக்கள் பிரதிநிதித்துவச் சட்டம், 1950இன் பிரிவு 17 மற்றும் 18-இன்கீழ் தண்டனைக்குரிய குற்றமாகும் என்பதால், வாக்காளா்கள் தாங்கள் ஒரு தொகுதியில் மட்டுமே பதிவு செய்யப்பட்டிருப்பதை உறுதிசெய்ய வேண்டும். பல்வேறு பதிவுகளைத் தவிா்க்க வேண்டும் என்று தலைமைத் தோ்தல்

அதிகாரி எலிஸ் வாஸ் தெரிவித்துள்ளாா்.