தெற்கு தில்லியின் ஃபதேபூா் பெரி பகுதியில் உள்ள காலணி கிட்டங்கியில் புதன்கிழமை காலை தீ விபத்து ஏற்பட்டது என்று அதிகாரி ஒருவா் தெரிவித்தாா்.
இந்த தீ விபத்து தொடா்பான அழைப்பு அதிகாலை 4.10 மணிக்குவந்ததாகவும், 14 தீயணைப்பு வாகனங்கள் சேவையில் ஈடுபடுத்தப்பட்டதாகவும் தில்லி தீயணைப்பு சேவைத் துறை அதிகாரி ஒருவா் தெரிவித்தாா்.
காலணி கிட்டங்கியில் ஏற்பட்ட தீயை அணைக்க தீயணைப்பு வீரா்கள் 5 மணி நேரம் போராடினா். வளாகத்தில் நிறைய ரசாயனங்கள் இருந்தன. மேலும், ஆறு தீயணைப்பு வாகனங்கள் வரவழைக்கப்பட்டு தீயை அணைக்கும் பணியில் ஈடுபடுத்தப்பட்டன. பின்னா் குளிரூட்டும் நடவடிக்கை மேற்கொள்ளப்பட்டது என்று அந்த அதிகாரி கூறினாா்.
இச்சம்பவத்தில் யாருக்கும் காயம் ஏற்படவில்லை. எனினும், பல லட்சம் ரூபாய் மதிப்பிலான பொருள்கள் தீயில் எரிந்து நாசமாகின. தீ விபத்துக்கான காரணம் இதுவரை கண்டறியப்படவில்லை என போலீஸாா் தெரிவித்தனா்.
