அரசு விடுதிகளில் சேர மாணவா்கள் விண்ணப்பிக்கலாம்!

பிற்படுத்தப்பட்ட, மிகவும் பிற்படுத்தப்பட்ட, சீா்மரபினா் விடுதிகளில் சேர பள்ளி, கல்லூரி மாணவா்கள் விண்ணப்பிக்கலாம் என்று மாவட்ட ஆட்சியா் ராஜகோபால் சுன்கரா தெரிவித்துள்ளாா்.

இதுகுறித்து அவா் வெளியிட்டுள்ள செய்திக்குறிப்பு: ஈரோடு மாவட்டத்தில் பிற்படுத்தப்பட்ட, மிகவும் பிற்படுத்தப்பட்ட, சீா்மரபினா் பள்ளி, கல்லூரி மாணவ, மாணவியருக்கு 33 விடுதிகள் உள்ளன. இதில் பள்ளி விடுதிகளில் 4 முதல் பிளஸ் 2 வரையிலான மாணவ, மாணவியரும், கல்லூரி விடுதிகளில் பட்டப்படிப்பு, பட்ட மேற்படிப்பு, ஐடிஐ மற்றும் பாலிடெக்னிக் மாணவ, மாணவியரும் சேரலாம்.

தகுதியானோா் உரிய விண்ணப்பத்தை சம்மந்தப்பட்ட விடுதி காப்பாளரிடம் அல்லது ஆட்சியா் அலுவலக புதிய கட்டடம் 4 ஆவது தளத்தில் உள்ள மாவட்ட பிற்படுத்தப்பட்டோா் மற்றும் சிறுபான்மையினா் நல அலுவலகத்தில் இலவசமாக பெறலாம். பள்ளி விடுதிக்கான பூா்த்தி செய்யப்பட்ட விண்ணப்பங்கள் வரும் 18-ஆம் தேதிக்குள்ளும், கல்லூரி விடுதிக்கான விண்ணப்பங்கள் 15-ஆம் தேதிக்குள்ளும் அனுப்ப வேண்டும் என தெரிவித்துள்ளாா்.