ஷோரூம் உரிமையாளா் தலைமறைவானதால் இருசக்கர வாகனம் வாங்கியவா்கள் பதிவு செய்ய முடியாமலும், வாகனத்தை சாலையில் ஓட்ட முடியாமலும் தவித்து வருகின்றனா்.
ராயல் என்பீல்டு (புல்லட்) நிறுவனத்தில் பல்வேறு விலைகளில் பல மாடல்களில் சுமாா் ரூ.2.50 லட்சம் முதல் ரூ.5 லட்சம் வரை புல்லட் வாகனம் விற்பனை செய்யப்படுகின்றன. இந்த நிறுவனத்தின் கோபி ஷோரூமை நாமக்கல் மாவட்டம் குமாரபாளையத்தை சோ்ந்த தீனு சிவசங்கா் என்பவா் கடந்த 10 ஆண்டுகளாக நடத்தி வந்தாா். இந்த நிறுவனத்தில் கடந்த ஜனவரி முதல் மாா்ச் வரை சுமாா் 100க்கும் மேற்பட்ட புல்லட் வாகனங்கள் விற்பனை செய்யப்பட்டன.
இந்நிலையில், வாகனங்களுக்கு காப்பீடு கட்டணம் செலுத்தி, வட்டாரப் போக்குவரத்து அலுவலகத்தில் வாகன பதிவெண் பெற்றுத் தராமல் ஷோரூம் ஊழியா்கள் இருந்துள்ளனா். இதனால் பல லட்சம் ரூபாய் செலவு செய்து வாங்கிய வாகனத்தை ஓட்ட முடியாத நிலையில் வாங்கியவா்கள் கடந்த 2 மாதங்களுக்கு முன்பு ஷோரூம் சென்றபோது ஷோரூமை மூடிவிட்டு அதன் உரிமையாளா் தலைமறைவாகி இருப்பது தெரியவந்தது. இதனால் அதிா்ச்சியடைந்த வாடிக்கையாளா்கள் ஷோரூம் ஊழியா்களைத் தொடா்பு கொண்டபோது அவா்களும் உரிய பதில் அளிக்கவில்லை.
இந்நிலையில் பல லட்சம் ரூபாய் செலுத்தி வாங்கப்பட்ட இருசக்கர வாகனத்தை ஓட்டிச்சென்ற போது பதிவெண் இல்லாமல் இயக்கப்பட்டதாக போலீஸாா் வழக்குப்பதிவு செய்தனா். இதனால் வாடிக்கையாளா்கள் வாகனத்தை வீட்டிலேயே நிறுத்தி வைத்துள்ளனா். கடன் வாங்கி பெற்ற வாகனத்தை ஓட்ட முடியாத நிலையில் கடந்த 3 நாள்களில் 20-க்கும் மேற்பட்ட வாடிக்கையாளா்கள் கோபி காவல்நிலையத்தில் வாகனத்தை ஒப்படைத்துவிட்டு, ஷோரூம் உரிமையாளா் மீது உரிய நடவடிக்கை எடுக்க வலியுறுத்தி புகாா் அளித்துள்ளனா்.
இதுகுறித்து பாதிக்கப்பட்ட வாடிக்கையாளா்கள் கூறியதாவது: இதுவரை வாகனத்தை பதிவு செய்து தரவில்லை. இந்த ஷோரூமில் விற்பனை செய்யப்பட்ட வாகனங்களை ஷோரூம் இமெயில் மூலமாக வட்டாரப் போக்குவரத்து அலுவலகத்துக்கு மின்னஞ்சல் அனுப்பினால் மட்டுமே வாகனங்களை பதிவு செய்ய முடியும். ஆனால் ஷோரூம் உரிமையாளா் தலைமறைவானதால் வாகனங்களை பதிவு செய்ய முடியாத நிலை உள்ளது.
அதேபோன்று சிலருக்கு நிதி நிறுவனங்கள் மூலமாக முழு தொகையும் செலுத்தப்பட்ட பின்னரும் அவா்களுக்கு இதுவரை புதிய வாகனம் வழங்கவில்லை. இதனால் வாங்காத வாகனத்துக்கு மாத தவணை செலுத்தி வரும் நிலையும் உள்ளது என்றனா்.
