ஆன்லைன் வா்த்தகத்தில் கோடிக்கணக்கில் மோசடி: இளைஞா் கைது

கோவை உள்பட நாடு முழுவதும் 20-க்கும் மேற்பட்டோரிடம் கோடிக் கணக்கில் மோசடி செய்த வடமாநில இளைஞரை போலீஸாா் கைது செய்தனா்.

கோவையைச் சோ்ந்த இளைஞா் ஒருவரின் வாட்ஸ்அப் எண்ணுக்கு கடந்த சில மாதங்களுக்கு முன்பு அழைப்பு வந்துள்ளது.

மறுமுனையில் பேசியவா், ஆன்லைனில் வா்த்தகம் செய்தால் அதிக லாபம் பெறலாம் எனக் கூறியுள்ளாா். இதை நம்பிய அந்த இளைஞரும் பல்வேறு தவணைகளாக ரூ.14.5 லட்சத்தை முதலீடு செய்துள்ளாா்.

அதற்கு லாபத் தொகை வந்ததாக காட்டியுள்ளது. அந்தப் பணத்தையும், முதலீடு செய்த பணத்தையும் அந்த இளைஞா் எடுக்க முயன்றுள்ளாா். ஆனால், முடியவில்லையாம். இதையடுத்து, அந்த நபரை தொடா்பு கொள்ள முயன்றபோதும் முடியவில்லையாம்.

தான் ஏமாற்றப்பட்டதை உணா்ந்த அவா், கோவை சைபா் கிரைம் போலீஸில் புகாா் அளித்தாா். போலீஸாா் வழக்குப் பதிவு செய்து விசாரணை நடத்தினா்.

இதில், மோசடியில் ஈடுபட்டது மத்திய பிரதேச மாநிலம், சாகா் பகுதியைச் சோ்ந்த சந்தீப் திவாரி (34) என்பது தெரியவந்தது.

இதையடுத்து, அவரைப் பிடிப்பதற்காக கோவை சைபா் கிரைம் போலீஸாா் தனிப்படை அமைத்தனா். அந்த தனிப்படையினா் மத்திய பிரதேச மாநிலத்தில் அவரைத் தேடி வந்த நிலையில், தனது சொந்த ஊரான சாகரிலேயே சந்தீப் திவாரி பதுங்கி இருப்பது தெரியவந்தது.

இதையடுத்து, சந்தீப் திவாரியை கைது செய்த தனிப் படை போலீஸாா், அவரை ரயில் மூலம் கோவைக்கு வியாழக்கிழமை அழைத்து வந்தனா்.

கோவையில் அவரிடம் நடைபெற்ற விசாரணையில், தமிழகம் மட்டுமின்றி பல்வேறு மாநிலங்களில் 20-க்கும் மேற்பட்டோரிடம் கோடிக்கணக்கில் மோசடியில் ஈடுபட்டது தெரியவந்தது. தொடா்ந்து அவரிடம் விசாரணை நடைபெற்று வருகிறது.