இடைத்தேர்தலை நேர்மையாக நடத்த வேண்டும்: அண்ணாமலை

ஈரோடு கிழக்குத் தொகுதி இடைத்தேர்தலை நேர்மையாக நடத்த வேண்டும் என தமிழக பாஜக தலைவர் அண்ணாமலை தெரிவித்துள்ளார்.

சென்னையில் செய்தியாளர்களுடன் அவர் பேசியதாவது,

’’தமிழகத்தில் அறிவிக்கப்படாத அவசரநிலை நடந்துகொண்டிருக்கிறது. இதனை நான் கூறவில்லை கம்யூனிஸ்ட் கட்சியைச் சேர்ந்தவர்கள் கூறுகிறார்கள்.

தமிழ்த்தாய் வாழ்த்துக்கு ஆளுநர் ஆர்.என். ரவி உரிய மரியாதை கொடுத்தார். உப்புசப்பில்லாத காரணத்துக்காக திமுக போராட்டம் நடத்துகிறது.

ஆளுநருக்கு எதிராக தமிழகம் முழுவதும் ஆபாசமாக சுவரொட்டிகள் ஒட்டப்படுகின்றன. காவல் துறை வேடிக்கை பார்க்கிறது. இது தவறு இல்லையா? திமுகவுக்கு எதிராக நாங்கள் சுவரொட்டிகள் ஒட்டலாமா? ஆளும் கட்சிக்கு ஒரு நியாயம்; எதிர்க்கட்சிகளுக்கு ஒரு நியாயமா?

டங்ஸ்டன் சுரங்கம் வராது என போராட்டத்தில் ஈடுபட்டுள்ள விவசாயிகளை சந்தித்து கூறுவதில் முதல்வர் மு.க. ஸ்டாலினுக்கு என்ன பிரச்னை?

மதுரையில் டங்ஸ்டன் சுரங்கம் வராது என மத்திய அரசு கூறியுள்ளது என்பதை நான் கூறிக்கொள்கிறேன். அப்படி வந்தால், விவசாயிகளுடன் நாங்கள் போராட்டத்தில் வந்த் அமருவோம்.

அண்ணா பல்கலைக் கழக மாணவி பாலியல் வன்கொடுமை வழக்கை திசைதிருப்ப ஆளுநரை பயன்படுத்துகிறது திமுக.

திமுகவுக்கு சாமரம் வீசி கம்யூனிச கட்சிகள் நீர்த்துப்போயுள்ளன. திமுக கூட்டணியில் இருந்து கம்யூனிஸ்ட் தோழர்கள் வெளியேற வேண்டும்.

இடைத்தேர்தல் தொடர்பாக பாஜகவின் முடிவு விரைவில் அறிவிக்கப்படும்.

ஈரோடு கிழக்குத் தொகுதி இடைத்தேர்தலில் வாக்குக்ள் 40 - 50 சதவீதத்தை தாண்டுமா? என்பது சந்தேகமாக உள்ளது. ஓராண்டுக்கான ஆட்சியாக இருந்தாலும் மக்கள் முழுமையாக வாக்களிக்க வேண்டும்’’ என அண்ணாமலை கேட்டுக்கொண்டார்.

இதையும் படிக்க | சென்னை - நெல்லை வந்தே பாரத் ரயிலில் கூடுதலாக 8 பெட்டிகள்!