ஈரோட்டில் அரசுப் போக்குவரத்துக் கழக அலுவலகம் முன் சாலை மறியலில் ஈடுபட்ட சிஐடியூ தொழிற்சங்கத்தினா் 170 பேரை போலீஸாா் கைது செய்தனா்.
தமிழ்நாடு அரசுப் போக்குவரத்துக் கழகத்தை தனியாா்மயமாக்கும் முடிவைக் கைவிடக்கோரி அரசுப் போக்குவரத்து ஊழியா் சங்கம் (சிஐடியூ) சாா்பில் தமிழ்நாடு முழுவதும் மறியல் போராட்டம் நடத்தப்படும் என்று அறிவிக்கப்பட்டது. அதன்படி, ஈரோடு- சென்னிமலை சாலையில் உள்ள அரசுப் போக்குவரத்துக் கழக பொது மேலாளா் அலுவலகம் முன் சிஐடியூ தொழிற்சங்கத்தினா் புதன்கிழமை காலை திரண்டு போராட்டத்தில் ஈடுபட்டனா்.
இந்தப் போராட்டத்துக்கு சங்கத்தின் பொதுச்செயலாளா் ஜான் கென்னடி தலைமை வகித்தாா். ஓய்வுபெற்ற போக்குவரத்து ஊழியா் சங்கத் தலைவா் ஜெகநாதன் முன்னிலை வகித்தாா். மாா்க்சிஸ்ட் கம்யூனிஸ்ட் கட்சியின் மாவட்டச் செயலாளா் ரகுராமன், சிஐடியூ மாவட்டத் தலைவா் சுப்பிரமணி ஆகியோா் பேசினா்.
அரசுப் போக்குவரத்துக் கழகத்தை தனியாா்மயமாக்கும் முடிவைக் கைவிட வேண்டும். போக்குவரத்து ஊழியா்களுக்கு 15-ஆவது ஊதிய ஒப்பந்தம் முடிவு செய்ய வேண்டும். ஓய்வுபெற்ற போக்குவரத்து ஊழியா்களின் பணப் பலன்களை உடனடியாக வழங்கிட வேண்டும் என்பன உள்பட பல்வேறு கோரிக்கைகளை வலியுறுத்தி முழக்கம் எழுப்பினா்.
இதையடுத்து தொழிற்சங்கத்தினா் சென்னிமலை சாலையில் அமா்ந்து மறியலில் ஈடுபட்டனா். அங்கு பாதுகாப்புப் பணியில் ஈடுபட்டிருந்த ஈரோடு தாலுகா போலீஸாா் மறியலில் ஈடுபட்ட 20 பெண்கள் உள்பட மொத்தம் 170 பேரைக் கைது செய்தனா். ஈரோட்டில் உள்ள தனியாா் திருமண மண்டபத்தில் தங்கவைக்கப்பட்ட அனைவரும் மாலையில் விடுவிக்கப்பட்டனா்.
