``ஈழத்திற்கு புறப்படும் முன் கருணாநிதிக்கு கடிதம் கொடுத்தேன்..." - வைகோ பகிர்வு!

சென்னை எழும்பூரில் மாவீரர் நாள் நிகழ்ச்சி மதிமுக சார்பில் நடைபெற்றது. அந்த நிகழ்ச்சியில் பேசிய ம.தி.மு.க பொதுச் செயலாளர் வைகோ, ``விடுதலைப் புலிகள் என் கிராமத்தில், என் வீட்டில் ஒருவருடம் தங்கினார்கள். அவர்களுக்கு என் தாயார் ஒருவருடம் உணவு சமைத்துக் கொடுத்தார். ஆனால், என் கிராமத்திலிருந்து ஒருவர் கூட காவல் நிலையத்துக்குச் சென்று, வைகோ வீட்டில் விடுதலைப் புலிகள் இருக்கிறார்கள் எனக் கூறவில்லை. விடுதலைப் புலிகளை மாற்றி மாற்றி பல்வேறு இடங்களில் தங்க வைத்தேன். ஈழத்திற்கு வந்து தலைவர் பிரபாகரனை சந்திக்க வேண்டும் என, சீட்டு மூலம் இரண்டு முறை கூறிய பின்னர்தான் பிரபாகரன் நான் ஈழத்திற்கு வர சம்மதம் தெரிவித்தார்.

பிரபாகரனைச் சந்திக்க இங்கிருந்து புறப்படும் முன், அங்கிருந்து உயிருடன் திரும்புவேனா என்பது உறுதியாகத் தெரியாது. அதனால், என் மனைவிக்கு பட்டு புடவை, என்னுடைய குழந்தைகளுக்கு புதிய ஆடைகள் எடுத்து கொடுத்தேன். ஏன் இந்த திடீர் அன்பளிப்பு என என் மனைவி கேட்டபோது, தி.மு.க வெற்றி பெற்றதை கொண்டாட வாங்கிக் கொடுத்தேன் என கூறினேன். யாருக்கும் தெரியாமல் ஈழத்திற்கு புறப்படும் முன் கருணாநிதிக்கு 6 பக்கம் கடிதம் எழுதிக் கொடுத்துவிட்டுச் சென்றேன். ரகசியமாக நான் ஈழம் சென்ற செய்தி, தமிழ்நாடு முழுவதும் பரவியது.

அப்போது 'வைகோ ஈழத்திற்கு சென்றதற்கும் தி.மு.க-விற்கு எந்த சம்மதமும் இல்லை' என அறிக்கை வெளியிட்டனர். இதனை தெரிந்துகொண்ட பிரபாகரன், உடனடியாக என்னைத் தமிழ்நாடு செல்ல வேண்டும் என தெரிவித்தார். ஆனால் நான் செல்ல மாட்டேன் என கடுமையாக மறுத்தேன். இருப்பினும் அவர் வலியுறுத்தி கூறியதால், நான் தமிழ்நாடு திரும்ப சம்மதித்தேன். அடுத்த நாள் காலை 5 மணிக்கு புறப்படும் முன், எனக்கு புட்டு, மீன், இறால் என விருந்து வைத்தார். என்னை தாக்குதலிருந்து காப்பாற்ற 57 விடுதலைப் புலிகளை அனுப்பி வைத்தார். அவரின் மனைவி, மகனின் பாதுகாப்புக்காக இரண்டு புலிகளைத்தான் அனுப்பினார் எனத் தெரிந்துக்கொண்டேன்.

ஒருவேளை நான் திரும்பும் வழியில் மாட்டிக்கொண்டால் என்னை சித்திரவதை செய்வார்களே என்ன செய்வது எனக் கேட்டு, எனக்கும் ஒரு சைனடு குப்பி வேண்டும் எனக் கேட்டேன். அப்படி ஒன்றும் நடக்காது என அதைக் கொடுக்க மறுத்தவர், என்னுடைய வற்புறுத்தலால், பிரபாகரன் தனது கழுத்தில் இருந்த ஒரு குப்பியை எனக்கும் ஒரு கயிற்றில் கட்டி, என் கழுத்தில் கட்டிவிட்டார். இப்போதும் அந்த குப்பி பத்திரமாக என்னிடம் உள்ளது. புறப்பட்டு வந்த நேரத்தில் காட்டில் கடும் பசியாக இருந்த நேரத்தில் மான் கறியை புலிகள் எனக்கு கொடுத்தார்கள். மகிழ்ச்சியுடன் எழுந்து அதைச் சாப்பிட்டேன். அதன் பின் நடந்தது அனைவருக்கும் தெரியும்.

எந்த இயக்கத்திற்கா உழைத்தேனோ, எந்த இயக்கத்தை நேசித்தேனோ, அந்த இயக்கமே என்னைக் கட்சியிலிருந்து வெளியேற்றியது. 30 ஆண்டு காலம் தி.மு.க-வில் பயணித்தபோது 27 முறை சிறைக்கு சென்றேன். தி.மு.க-வின் தலைவருக்கு உயிருக்கு உயிரான, மெய்காப்பாளராக இருந்திருக்கிறேன். ஆனாலும், நான் கட்சியில் இருந்து வெளியேற்றப்பட்டேன். 1964-ல் அண்ணாவின் முன்னிலையில்தான் அங்கீகாரம் பெற்றேன். ம.தி.மு.க-வில் 30 ஆண்டுகளாக அரசியல் பணி செய்து வருகிறேன்.

எனது வாழ்நாளில் 60 ஆண்டுகள் பொதுவாழ்விலேயே கடந்துவிட்டது. கட்சியில் ஒவ்வொரு நாளும் ஒரு 5 இளைஞர்களை இணைக்க முயற்சி செய்யுங்கள். கொடி இல்லாத கொடிமரங்களில் கொடிகளை ஏற்றுங்கள். அமைப்பை அடிமட்டத்திலிருந்து வலுப்படுத்துங்கள். அப்போது தான் நமக்கான நாள் வரும்” என தொண்டர்களுக்கு வைகோ அறிவுரை வழங்கினார்.