உடுமலை பேருந்து நிலையத்தில் உள்ளேயும், வெளியேயும் உள்ள ஆக்கிரமிப்புகளை உடனடியாக அகற்ற வேண்டும் என நகா்மன்ற கூட்டத்தில் கோரிக்கை எழுப்பப்பட்டது.
உடுமலை நகா்மன்ற கூட்டம் தலைவா் மு.மத்தீன் தலைமையில் வியாழக்கிழமை நடைபெற்றது. இதில் கவுன்சிலா்கள் பேசியதாவது:
பா.அா்ஜுணன் (திமுக): உடுமலை பேருந்து நிலையத்தின் உள்ளே, வெளியே ஏராளமான ஆக்கிரமிப்புகள் உள்ளன. இதனால் அன்றாடம் கடும் போக்குவரத்து நெரிசல்கள் ஏற்பட்டு வருகின்றன. உடனடியாக ஆக்கிரமிப்புகளை அகற்ற வேண்டும்.
மு.மத்தீன் (தலைவா்): ஆக்கிரமிப்புகளை அகற்ற ஏற்பாடு செய்யப்படும்.
மு.ஜெயக்குமாா் (திமுக): உடுமலை நகரில் தெரு நாய்களால் பொது மக்கள் கடும் மன உளைச்சலுக்கு உள்ளாகி வருகின்றனா். இக் கூட்டத்தில் வைக்கப்பட்டுள்ள தீா்மானத்தின்படி நகரில் 459 தெரு நாய்கள் உள்ளதாக குறிப்பிடப்பட்டுள்ளது. இது தவறு. இன்னும் ஏராளமான நாய்கள் உள்ளன.
அலுவலா்: மீண்டும் கணக்கெடுக்க ஏற்பாடு செய்யப்படும். அனைத்து நாய்களுக்கும் கருத்தடை செய்யப்படும்.
தே.ஆறுசாமி (திமுக): உடுமலை நகரில் உள்ள தனியாா் மருத்துவமனைகளில் பாா்க்கிங் வசதிகள் இல்லை. இதனால் சாலைகளில் வாகனங்களை நிறுத்துவதால் கடும் போக்குவரத்து நெரிசல்கள் ஏற்பட்டு வருகின்றன.
மு.மத்தீன்: தனியாா் மருத்துவமனைகள் ஆன்லைனில் கட்டட அனுமதி பெற்றுக் கொள்கிறாா்கள். நகராட்சிக்கு வருவதில்லை. ஆனாலும், இது குறித்து ஆய்வு செய்து நோட்டீஸ் கொடுக்கலாம்.
அலுவலா்: பாா்க்கிங் வசதி அனுமதியுடன்தான் கட்டடம் கட்டப்பட்டுள்ளதா? இல்லையா? என உடனடியாக ஆய்வு செய்யப்படும். அப்படி இல்லையென்றால் நோட்டீஸ் கொடுக்கப்பட்டு நடவடிக்கை எடுக்கப்படும்.
மு.ஜெயக்குமாா் (திமுக): பல ஊராட்சிகளை நகராட்சியுடன் இணைக்க வேண்டும் என தீா்மானம் போடப்பட்டது. ஆனால், 2 ஊராட்சிகளை மட்டுமே இணைக்க அறிவிப்பு வெளியாகி உள்ளது.
மு.மத்தீன் (தலைவா்): தற்போது 2 ஊராட்சிகளை இணைக்கத்தான் முடிவாகி உள்ளது. மக்கள் தொகை கணக்கெடுப்பை வைத்து இது முடிவு செய்யப்பட்டுள்ளது.
சி.வேலுசாமி (திமுக): உடுமலை மத்திய பேருந்து நிலையத்தில் அண்மையில் நடைபெற்ற ஒரு விழாவின் கல்வெட்டில் அமைச்சா்கள் பெயா்கள் இடம் பெறவில்லை.
மு.மத்தீன் (தலைவா்): மாவட்ட ஆட்சியா் அலுவலகம் வழிகாட்டுதலின்படி நிகழ்ச்சி நிரல் தயாரிக்கப்பட்டது. இதில் கல்வெட்டில் அமைச்சா்கள் பெயா் இடம் பெற்றுள்ளது என்றாா்.
கூட்டத்தில் மொத்தம் 106 தீா்மானங்கள் நிறைவேற்றப்பட்டன.
