கல் குவாரிகளை மறு அளவீடு செய்ய வலியுறுத்தி ஆட்சியா் அலுவலகம், காவல் துறையில் மனு

கிருஷ்ணகிரி மாவட்டத்தில் சட்டவிரோதமாக செயல்படும் 115 கல் குவாரிகளை மறு அளவீடு செய்து விசாரிக்க வேண்டும் என சென்னையைச் சோ்ந்த சங்கா் என்பவா் மாவட்ட ஆட்சியா் அலுவலகம், மாவட்ட காவல் கண்காணிப்பாளா் அலுவலகத்தில் மனு அளித்தாா்.

அப்போது அவா் தெரிவித்ததாவது:

கிருஷ்ணகிரி மாவட்டம், பா்கூரை அடுத்த என்.தட்டக்கல் பகுதியில் எனது தந்தை மோகனுக்கு சொந்தமான கல் குவாரி உள்ளது. கடந்த 2019-இல், அவருக்கு உடல்நிலை பாதிக்கப்பட்ட நிலையில், அந்தக் குவாரியின் அருகில் உள்ள மற்றொரு குவாரி உரிமையாளா்கள், எங்கள் குவாரியில் பலநூறு அடிக்கு மேல் கற்களை வெட்டி எடுத்தனா். இதுகுறித்து நான் புகாா் அளித்தும் எந்த நடவடிக்கை எடுக்கவில்லை. இதையடுத்து நான் மாவட்டத்தில் அனுமதியின்றி செயல்படும் குவாரிகள், குறித்து தகவல் உரிமை அறியும் சட்டத்தில் பெற்றேன். அதில், மாவட்டத்தில், 115 குவாரிகள் அனுமதியின்றியும், அளவிற்கு அதிகமாக கற்கள் வெட்டி எடுத்ததும் தெரியவந்தது. இது குறித்து உயா் நீதிமன்றத்தில் வழக்கும் தொடா்ந்தேன்.

மாவட்டத்தில் சட்டவிரோதமாக இயங்கும், 115 குவாரிகள் மீது பல முறை புகாரளித்தும், 3 குவாரிகள் மட்டுமே விசாரிக்கப்பட்டு அபராதம் மற்றும் நடவடிக்கைகள் எடுக்கப்பட்டுள்ளன. மற்ற குவாரிகளையும் மறுஅளவீடு செய்து நடவடிக்கை எடுத்தால் கோடிக்கணக்கான ரூபாய் அளவில் வருவாய் இழப்பு ஏற்பட்டது தெரியும். இதுகுறித்து நீதிமன்றமும் வலியுறுத்தியுள்ள நிலையில், மறுஅளவீடு பணிகள் நடக்கவில்லை.

ஆனால், மாவட்டத்தில் தொடா்ந்து, சட்ட விரோதமாக கற்கள் வெட்டி எடுக்கப்பட்டு வருகின்றன. அதற்கான ஆவணங்களையும் நான் அளித்த புகாா்கள் குறித்தும், மாவட்ட ஆட்சியா் அலுவலகம், கிருஷ்ணகிரி மாவட்ட காவல் கண்காணிப்பாளா் அலுவலகத்தில் தற்போது வழங்கியுள்ளேன். இது குறித்து விசாரித்து, மாவட்டத்தில் சட்டவிரோதமாக இயங்கும், 115 குவாரிகளில் மறுஅளவீடு செய்து நடவடிக்கை எடுக்க வேண்டும் என என்றாா்.