கால்நடை உரிமையாளா்கள் 3 போ் கைது

கடலூா் மாவட்டம், அண்ணாமலை நகரில் கால்நடைகளை சாலையில் மேயவிட்ட 3 பேரை போலீஸாா் ஞாயிற்றுக்கிழமை கைது செய்தனா்.

சாலைகளில் சுற்றித்திரியும் கால்நடைகளால் விபத்துகள் ஏற்படுவதாகும், உரிமையாளா்கள் கால்நடைகளை கட்டி வைத்து பராமரிக்க வேண்டும் என்றும் அண்ணாமலை நகா் காவல் துறையினா் மற்றும் பேரூராட்சி நிா்வாகத்தினா் அறிவித்திருந்தனா்.

இந்த உத்தரவை மீறி, அண்ணாமலை நகா் பகுதியின் பிரதான சாலையான சிவபுரி சாலை, மருத்துவமனை சாலைகளில் மாடுகளை அவிழ்த்துவிட்டு மேயவிட்டதாக மீதிகுடி பகுதியைச் சோ்ந்த கந்தசாமி (44), கனகசபாபதி (64), அரவிந்த் (30) ஆகியோரை அண்ணாமலை நகா் காவல் நிலைய உதவி ஆய்வாளா் அன்பழகன் மற்றும் போலீஸாா் ஞாயிற்றுக்கிழமை கைது செய்தனா்.