குலுங்கும் மதுரை: டங்ஸ்டன் பேரணியில் ஆயிரக்கணக்கானோர் பங்கேற்பு

டங்ஸ்டன் சுரங்கப் பணிகளை முழுமையாகக் கைவிட வலியுறுத்தி மேலூர் அருகே இன்று காலை தொடங்கிய விவசாயிகள் பேரணியில் ஆயிரக்கணக்கானோர் பங்கேற்றுள்ளனர்.

இன்று காலை பேரணியாகப் புறப்பட்டு பிறகு வாகனங்களில் சென்ற விவசாய அமைப்பினர் மற்றும் கிராம மக்கள் கூட்டம் மதுரை தமுக்கம் அரங்கை அடைந்துள்ளது.

மேலூரில் நூற்றுக்கணக்கானவர்களுடன் பங்கேற்ற இந்தப் பேரணியில், பல்வேறு கிராமங்களிலிருந்து தன்னிச்சையாக ஏராளமான மக்கள் வரத் தொடங்கி அது ஆயிரக்கணக்கானோராக மாறியது.

டங்ஸ்டன் சுரங்கம் அமைக்கப்பட்டால் பாதிக்கப்படும் அரிட்டாப்பட்டி, வல்லாளபட்டி, நாயக்கர்பட்டி, மீனாட்சிபுரம் உள்ளிட்ட பல்வேறு கிராமங்களைச் சேர்ந்த மக்கள் இந்தப் பேரணியில் பங்கேற்றுள்ளனர்.

தமுக்கத்தில் உள்ள தலைமை அஞ்சல் அலுவலகம் நோக்கி வந்த இந்தப் பேரணி கிட்டத்தட்ட 16 கி.மீ. தொலைவுகளைக் கொண்டிருந்தது. விவசாயி அமைப்பினர் மட்டுமல்லாமல், வியாபாரிகள், பொதுமக்கள் என பலரும் இந்த போராட்டத்துக்கு ஆதரவு கொடுத்து, இன்று அப்பகுதிகளில் கடையடைப்புப் போராட்டமும் நடைபெற்று வருகிறது.