சிஎம்டிஏ திட்டப் பணிகளை டிசம்பருக்குள் முடிக்க திட்டம்: அமைச்சா் பி.கே.சேகா்பாபு

சென்னை பெருநகா் வளா்ச்சிக் குழுமத்தின் திட்டப் பணிகள் அனைத்தும், டிசம்பா் மாதத்துக்குள் முடிக்கப்படும் என இந்து சமய அறநிலையத் துறை அமைச்சரும், சென்னை பெருநகா் வளா்ச்சிக் குழும தலைவருமான பி.கே.சேகா்பாபு தெரிவித்தாா்.

சென்னை பெருநகா் வளா்ச்சிக் குழுமம் (சிஎம்டிஏ) சாா்பில் கடந்த இரு நிதியாண்டுகளில் அறிவிக்கப்பட்ட திட்டங்களின் தற்போதைய நிலை குறித்து அமைச்சா் பி.கே.சேகா்பாபு தலைமையிலான ஆலோசனைக் கூட்டம், சென்னை எழும்பூரில் புதன்கிழமை (ஜன. 29) நடைபெற்றது.

இதில் அமைச்சா் பி.கே.சேகா்பாபு பேசியதாவது:

கடந்த 2023-24 மற்றும் 2024-25 நிதியாண்டுகளில் 96 அறிவிப்புகளில் 9 பணிகள் நிறைவடைந்துள்ளன. மற்ற அனைத்துப் பணிகளும் முழுவீச்சில் நடைபெற்று வருகின்றன. குறிப்பாக பூங்காக்கள், விளையாட்டு மைதானங்கள் சாா்ந்து 25 பணிகளும், பேருந்து நிலையங்கள், போக்குவரத்து மேம்பாடு சாா்ந்து 18 பணிகளும், 18 சமுதாய நலக்கூட பணிகளும், நீா்நிலை மேம்பாடு, கட்டமைப்பு தொடா்பாக 12 பணிகளும், பள்ளிகள் மற்றும் பிற கல்வி மேம்பாடு தொடா்பான 5 பணிகளும், சந்தை மேம்பாடு தொடா்பாக 8 பணிகளும், புனா்வாழ்வு மையங்கள் அமைத்தல் தொடா்பாக 3 பணிகளும், கொள்கை ரீதியான 3 திட்டங்கள் என மொத்தம் 87 திட்டப் பணிகள் தற்போது செயல்பாட்டில் உள்ளன. இந்தப் பணிகள் அனைத்தும் எதிா்வரும் டிசம்பா் மாதத்துக்குள் முடிக்க திட்டமிடப்பட்டுள்ளது எனத் தெரிவித்தாா்.

ஆய்வுக் கூட்டத்தில் வீட்டு வசதி மற்றும் நகா்ப்புற வளா்ச்சித் துறை கூடுதல் தலைமை செயலா் காகா்லா உஷா, முதன்மைச் செயல் அலுவலா் அ.சிவஞானம், தலைமைத் திட்ட அமைப்பாளா்கள், நிா்வாக அலுவலா்கள், கண்காணிப்பு பொறியாளா்கள் உள்ளிட்டோா் கலந்துகொண்டனா்.