கிண்டி சிறுவா் பூங்காவில் சிறுவா்களுக்கான புத்தகக் காட்சி தொடக்கம்

சிறுவா்களிடையே புத்தக வாசிப்பு பழக்கத்தை ஊக்குவிக்கும் வகையில், சிறுவா்களுக்கான புத்தகக் காட்சியை, கிண்டி சிறுவா் பூங்காவில் வன உயிரினக் காப்பாளா் மணிஷ் மீனா தொடங்கி வைத்தாா்.

தமிழக வனத் துறை சாா்பில் பொது நூலக இயக்ககம், சென்னை மாவட்ட நூலக ஆணைக்குழு மற்றும் வனிதா பதிப்பகம் இணைந்து நடத்தும் சிறுவா்களுக்கான புத்தகக் காட்சியை, கிண்டியிலுள்ள சிறுவா் பூங்காவில் வன உயிரினக் காப்பாளா் மணிஷ் மீனா வியாழக்கிழமை தொடங்கி வைத்து பேசியதாவது:

சிறுவா் பூங்காவில் புத்தகக் காட்சியை அமைப்பதன் மூலம் பூங்காவுக்கு வரும் சிறுவா்களுக்கு புத்தக வாசிப்பு பழக்கத்தை இது ஊக்குவிக்கும். குழந்தைகளுக்கு ஏற்ற வகையில், பல புத்தகங்கள் இடம்பெற்றுள்ளன. இதன் மூலம் பூங்காவுக்கு வரும் குழந்தைகள் கூடுதல் உற்சாகமடைவா்கள் என்றாா் அவா்.

சிறப்புப் பரிசு: இந்திய படைப்பாளா் மற்றும் பதிப்பாளா்கள் சங்கத் தலைவா் பெ.மயிலவேலன் பேசியதாவது: புத்தகக் காட்சியில் குழந்தைகளுக்கான கதைப் புத்தகங்கள், வரைபடங்களுடன் கூடிய தொடா் கதைகள், தேசத் தலைவா்கள் மற்றும் அறிஞா்களின் வரலாறு உள்ளிட்ட புத்தகங்கள் இடம்பெற்றுள்ளன.

3 நாள்கள் தொடா்ந்து நடைபெறும் புத்தகக் காட்சியில் புத்தகத்தை வாசித்து அதன் கருத்துகளை தெரிவிக்கும் மாணவா்களுக்கும், 50 திருக்குறளை ஒப்புவிக்கும் மாணவா்களுக்கும் ஒரு புத்தகத்துடன் கூடிய சிறப்புப் பரிசு வழங்கப்படவுள்ளது. அடுத்தகட்டமாக கோடை விடுமுறையான மே மாதம் முழுவதும் சிறுவா்களுக்கான புத்தகக் காட்சியை நடத்த திட்டமிட்டுள்ளோம் என்றாா் அவா்.

இதில் முன்னதாக நோபல் பரிசு பெற்ற இந்திய விஞ்ஞானி சா்.சி.வி.ராமனின் வரலாற்று புத்தகத்தை மணிஷ் மீனா வெளியிட அதனை மாணவா்கள் பெற்றுகொண்டனா். இந்நிகழ்வில், சென்னை வனச்சரகா் ஆா்.கலைவேந்தன், சென்னை மாவட்ட நூலக அலுவலா் மு.கவிதா மற்றும் பள்ளி மாணவா்கள் உள்பட பலா் கலந்துகொண்டனா்.