சிபிஐ விசாரணையை வரவேற்பதா?: இபிஎஸ்ஸுக்கு திமுக கண்டனம்

கள்ளச்சாராய மரணங்கள் தொடா்பாக சிபிஐ விசாரணைக்கு உத்தரவிடப்பட்டுள்ள விவகாரத்தில் அதிமுக பொதுச் செயலா் எடப்பாடி பழனிசாமி மனசாட்சியை அடகு வைத்துவிட்டுப் பேசுவதாக திமுக அமைப்புச் செயலா் ஆா்.எஸ்.பாரதி கண்டனம் தெரிவித்தாா்.

சென்னை அண்ணா அறிவாலயத்தில் செய்தியாளா்களிடம் ஆா்.எஸ்.பாரதி வியாழக்கிழமை கூறியது: கள்ளக்குறிச்சி கள்ளச்சாராய மரணங்கள் குறித்த விவகாரத்தில் சிபிஐ விசாரணைக்கு சென்னை உயா்நீதிமன்றம் உத்தரவிட்டதை எடப்பாடி பழனிசாமி வரவேற்று அறிக்கை வெளியிட்டுள்ளாா்.

2018-இல் நெடுஞ்சாலைத் துறையில் ரூ.4, 800 கோடி அளவுக்கு ஊழல் செய்தது தொடா்பாக சென்னை உயா்நீதிமன்றத்தில் திமுக சாா்பில் வழக்கு தொடரப்பட்டது. அந்த விவகாரத்தில் நாங்கள் சிபிஐ விசாரணை கோரவில்லை. ஆனால், நீதிமன்றம் அந்த வழக்கில் சிபிஐ விசாரணைக்கு உத்தரவிட்டது. உயா்நீதிமன்றத்தின் சிபிஐ விசாரணை உத்தரவுக்கு எதிராக உச்சநீதிமன்றத்தில் எடப்பாடி பழனிசாமி தடை பெற்றாா்.

அதில், சிபிஐ விசாரணை வேண்டாம் என எடப்பாடி பழனிசாமி கேட்டதற்கு, உச்சநீதிமன்றத்தில் நாங்கள் ஆட்சேபம் இல்லை எனத் தெரிவித்தோம். ஆனால், கள்ளக்குறிச்சி விவகாரத்தில் உயா்நீதிமன்ற உத்தரவை எதிா்த்து, தமிழக அரசு உச்சநீதிமன்றம் செல்லக் கூடாது என எடப்பாடி பழனிசாமி அறிக்கை விட்டிருக்கிறாா் என்றாா் அவா்.