தோ்தல் ஆணையத்தின் 2025 ஆம் ஆண்டுக்கான வரைவு வாக்காளா் பட்டியல் சிறப்பு சுருக்கமுறை திருத்த முகாம் சேலம் மாவட்டத்துக்கு உள்பட்ட 11 சட்டப் பேரவைத் தொகுதிகளில் சனிக்கிழமை நடைபெற்றது. ஞாயிற்றுக்கிழமையும் (நவ.17) இந்த முகாம் நடைபெறுகிறது.
வரைவு வாக்காளா் பட்டியல் சிறப்பு சுருக்கமுறை திருத்தம் கடந்த மாதம் 29 ஆம் தேதி முதல் நவம்பா் 28 ஆம் தேதி வரை நடைபெறுகிறது. இதுதொடா்பாக சேலம் மாவட்டத்துக்கு உள்பட்ட 11 பேரவைத் தொகுதிகளில் 1,269 வாக்குச்சாவடி மையங்களில் 3,264 வாக்குச்சாவடிகளில் சனி, ஞாயிற்றுக்கிழமை ஆகிய இரண்டு நாள்கள் காலை 9 மணி முதல் மாலை 5 மணி வரை நடைபெறுகிறது.
அமைச்சா் ஆய்வு
சேலம் மாநகராட்சி, பாவடி மேல்நிலைப் பள்ளியில் வாக்காளா் பட்டியல் சுருக்க முறை திருத்தம் சிறப்பு முகாமை அமைச்சா் ராஜேந்திரன் பாா்வையிட்டாா். அதேபோல நான்கு ரோடு சிறுமலா் மேல்நிலைப்பள்ளி, அரியாகவுண்டம்பட்டி மாநகராட்சி தொடக்கப் பள்ளி ஆகிய வாக்குச்சாவடிகளில் ஆட்சியா் ரா.பிருந்தாதேவி ஆய்வு செய்தாா்.
மேற்படி சிறப்பு சுருக்கமுறை திருத்தத்திற்கான விண்ணப்பங்கள் வரும் 28 ஆம் தேதி வரை பெறப்பட்டு, 2025 ஆம் ஆண்டு ஜனவரி 6 ஆம் தேதி இறுதி வாக்காளா் பட்டியல் வெளியிடப்படுகிறது.
சங்ககிரி
சங்ககிரி சட்டப் பேரவைத் தொகுதிக்கு உள்பட்ட 315 வாக்குச்சாவடிகளில் வாக்காளா் பட்டியலில் பெயா் சோ்ப்பு, நீக்கம், உள்ளிட்ட திருத்தங்களை மேற்கொள்வதற்காக சனிக்கிழமை நடைபெற்ற சிறப்பு முகாமில் 1,423 போ் விண்ணப்பம் அளித்துள்ளனா்.
வாக்காளா் பட்டியலில் புதிதாக பெயா் சோ்க்க 753 போ், பெயா் நீக்கம் செய்யக் கோரி 294 போ், தொகுதி, வாா்டு, முகவரி மாற்றங்கள், திருத்தங்கள் கோரி 376 போ் என மொத்தம் 1,423 போ் விண்ணப்பம் அளித்துள்ளனா்.
சிறப்பு முகாமில் நடைபெற்ற பணிகளை சங்ககிரி கோட்டாட்சியா் ந.லோகநாயகி ஆய்வு செய்தாா். சங்ககிரி அருகே உள்ள நட்டுவம்பாளையம் அரசு மேல்நிலைப் பள்ளியில் அமைக்கப்பட்டுள்ள சிறப்பு முகாமில் சேலம் மக்களவை உறுப்பினரும், திமுக சேலம் மேற்கு மாவட்டச் செயலாளருமான டி.எம்.செல்வகணபதி பாா்வையிட்டு திமுக வாக்குச்சாவடி முகவா்களின் செயல்பாடுகள், வாக்காளா் பட்டியலில் பெயா் சோ்க்க அளிக்கப்பட்ட விண்ணப்பங்களை கேட்டறிந்தாா்.
தம்மம்பட்டி
கெங்கவல்லி சட்டப் பேரவைத் தொகுதியில் உள்ள 264 வாக்குச்சாவடி மையங்களில் வாக்காளா் பெயா் சோ்த்தல், நீக்கல் முகாம் சனிக்கிழமை நடைபெற்றது.
கெங்கவல்லி வட்டத்தில் வாக்காளா் பட்டியலில் பெயா்களை சோ்க்கக் கோரி 486 போ், நீக்கம், திருத்தம் செய்யக் கோரி 776 போ் , தலைவாசல் வட்டத்தில் வாக்காளா் பட்டியலில் பெயா்களை சோ்க்கக் கோரி 393 போ், பெயா் நீக்கம், முகவரி திருத்தம் செய்யக் கோரி 581 போ் என மொத்தம் 1,357 போ் வாக்குச்சாவடி நிலை அலுவலா்களிடம் மனு அளித்தனா்.
ஞாயிற்றுக்கிழமையும் முகாம் நடைபெறும் என கெங்கவல்லி வட்டாட்சியா் பாலகிருஷ்ணன் தெரிவித்துள்ளாா்.
