தற்கொலை செய்த இளைஞரின் உடலை போலீஸாா் எடுத்துச் செல்ல எதிா்ப்பு: பொதுமக்கள் போராட்டம்

விருதுநகா் மாவட்டம், ராஜபாளையம் அருகே விஷம் குடித்து தற்கொலை செய்து கொண்ட இளைஞரின் உடலை மீட்டு, கூறாய்வுக்கு அனுப்பி வைக்க முயன்ற போலீஸாருக்கு எதிா்ப்புத் தெரிவித்து பொதுமக்கள் செவ்வாய்க்கிழமை போராட்டத்தில் ஈடுபட்டனா்.

விருதுநகா் மாவட்டம், ராஜபாளையம் அருகேயுள்ள நக்கனேரி கிராமத்தைச் சோ்ந்த செந்தமிழ் செல்வன் மகன் செல்வகுமாா் (37). இவருக்கு மனைவி, இரு குழந்தைகள் உள்ளனா். இவா் விஷம் குடித்து தற்கொலை செய்து கொண்டாா்.

தகவலறிந்த வந்த சேத்தூா் ஊரக காவல் நிலைய போலீஸாா் அவரது உடலை மீட்டு, கூறாய்வுக்காக எடுத்துச் செல்ல முயன்றனா். அவா் தனது தற்கொலைக்கு காரணம் போலீஸாா் கொடுத்த தொல்லைதான் என்று கடிதம் எழுதி வைத்திருந்ததால், அவரது உடலை எடுத்துச் செல்ல அவரது உறவினா்கள், ஊா் பொதுமக்கள் எதிா்ப்புத் தெரிவித்து, போலீஸாரை முற்றுகையிட்டனா்.

தகவலறிந்து வந்த ராஜபாளையம் காவல் துணைக் கண்காணிப்பாளா் பிரீத்தி பொதுமக்களிடம் பேச்சுவாா்த்தை நடத்தினாா். அப்போது, அவா் கூறியதாவது: தற்கொலை செய்து கொண்ட செல்வகுமாா் மதுக் கடைகளில் மதுப் புட்டிகளை வாங்கி, அதை கூடுதல் விலைக்கு விற்பனை செய்து வந்தாா். இதுகுறித்து அறிந்த சேத்தூா் ஊரக காவல் நிலைய போலீஸாா், இவரைப் பலமுறை தகுந்த ஆதாரத்துடன் பிடித்து வழக்குப் பதிவு செய்தனா்.

மேலும், போலீஸாா் பலமுறை இவருக்கு எச்சரிக்கை விடுத்தும் இரு சக்கர வாகனத்தில் சென்று மது விற்பனை செய்து வந்ததால், இவரை போலீஸாா் கைது செய்து, இரு சக்கர வாகனத்தைப் பறிமுதல் செய்தனா். அனைத்து நடவடிக்கைகளும் சட்டப்படிதான் எடுக்கப்பட்டிருக்கிறது என்றாா் அவா்.

இதையடுத்து, அவரது உடலை மீட்டு, ராஜபாளையம் அரசு மருத்துவமனைக்கு அனுப்பி வைத்தனா். மேலும், அசம்பாவிதங்கள் ஏதும் நடைபெறாமல் இருக்க இந்தக் கிராமத்தில் போலீஸாா் பாதுகாப்புப் பணியில் ஈடுபட்டனா்.