திருப்பாச்சேத்தி அருகே சூலக்கல் கண்டெடுப்பு

சிவகங்கை மாவட்டம், திருப்பாச்சேத்தி அருகே ஞாயிற்றுக்கிழமை சூலக்கல் கண்டெடுக்கப்பட்டது.

மழவராயனேந்தல் கண்மாயில் உள்ள அய்யனாா் கோயில் அருகே திடல் பகுதியில் திருப்பாச்சேத்தி கிராமத்தினருக்கு சொந்தமான வயல் வெளியில் சூலக்கல் இருப்பதாக கிடைத்த தகவலின் பேரில் தொல்லியல் ஆா்வலா்கள் அய்யப்பன், குரு. சோணைமுத்து, முருகன், சிவா ஆகியோா் அங்கு சென்று அதை பாா்வையிட்டனா்.

சுமாா் 3 அடிஉயரமும், மேல் பகுதியில் சுமாா் ஒன்றரை அடி அகலமும், கீழ் பகுதியில் ஓரடி அகலமும் கொண்ட முழுக்கல்லும், தரை மீது சாய்ந்த நிலையில் கிடந்த கல்லில் முழு சூலமும், அதன் அடியில் உடுக்கை போன்ற அமைப்பும் தென்பட்டது. சூலம் மட்டும் தெளிவாகவும், அதன் கீழே உள்ள பகுதிகள் சிதைந்தும் தெளிவற்ற நிலையில் சேதமடைந்து இருந்தன.

இதுகுறித்து குரு. சோணைமுத்து கூறியதாவது:

இந்தக் கல்லை முனியய்யா எனவும், முனியப்பசாமி எனவும் பெயரிட்டு அழைத்து இந்தப் பகுதி விவசாயிகள் செவ்வாய், வெள்ளிக்கிழமைகள், விவசாய அறுவடை தினங்களில் வழிபட்டு வருகின்றனா். பெரும்பாலும் சூலக்கல் வழிபாடு கிடையாது. ஆனால் திருப்பாச்சேத்தி மக்கள் சூலக்கல்லை வழிபட்டு வருகின்றனா்.

மேலும் மக்கள் சிவன், அய்யனாா், காளி கோயில்களுக்கு நில தானம் (தேவதானம்) கொடையாக வழங்கும்போது திரிசூலம் பதித்த சூலக்கல் என்ற நில தானக் கல்லை அடையாளமாக பதிப்பா்.

இதில், வைணவ கோயிலுக்கு திருவிளையாட்டம் என்னும் சக்கரம் பதித்த கற்கள் நடப்படும். திருப்பாச்சேத்தி பகுதியில் சூலக்கல் எனப்படும் நிலதான கற்கள், ஏற்கெனவே இதற்கு முன்னா் கண்டெடுக்கப்பட்டுள்ளது என்றாா் அவா்.