தொழிலாளி உயிரிழப்பு: ரிக் உரிமையாளா் வீட்டில் சடலத்தை வைத்து போராட்டம்

ஆந்திர மாநிலத்தில் உயிரிழந்த திருச்செங்கோட்டைச் சோ்ந்த ரிக் தொழிலாளியின் உடலை ரிக் உரிமையாளா் வீட்டின் முன் வைத்து அவரது உறவினா்கள் போராட்டத்தில் ஈடுபட்டனா்.

திருச்செங்கோட்டை அடுத்த வட்டூா் ஊராட்சிக்கு உள்பட்ட வேலனம்பட்டி பகுதியைச் சோ்ந்தவா் செந்தில்குமாா் (46). இவரது மனைவி சவிதா. கோகுல் ( 22) மௌனிஷ் (19) என்ற இரு மகன்கள் உள்ளனா். கடந்த 17 ஆண்டுகளாக செந்தில்குமாா் தனியாா் போா்வெல் நிறுவனத்தில் ரிக் ஓட்டுநராக வேலைபாா்த்து வந்தாா்.

இந்த நிலையில் ஆள்துளைக் கிணறு அமைக்க ஆந்திர மாநிலம், கடப்பா மாவட்டம் புலிவெந்துலா பகுதிக்கு சென்றிருந்தபோது செந்தில்குமாா் கடந்த 20 ஆம் தேதி பிற்பகல் திடீரென உயிரிழந்தாா். இதுகுறித்து செந்தில்குமாரின் மனைவிக்கு தகவல் கொடுத்த ரிக் உரிமையாளா் மணி, அவரை மட்டும் ஆந்திர மாநிலத்துக்கு அழைத்துச் சென்று பிரேதப் பரிசோதனை முடித்து உடலை செந்தில்குமாரின் தாய் வசித்துவரும் வட்டூா் கவுண்டம்பாளையம் பகுதிக்கு அனுப்பினாா்.

இந்த சம்பவம் குறித்து தகவல் அறிந்து வந்த உறவினா்கள் செந்தில்குமாரின் இறப்பு குறித்து விசாரித்தபோது முன்னுக்கு பின் முரணான தகவல் கிடைக்கவே அவரது உயிரிழப்பில் சந்தேகம் இருப்பதாகக் கூறி செந்தில்குமாரின் சடலத்தை அத்திமரப்பட்டியில் உள்ள ரிக் உரிமையாளா் மணியின் வீட்டுக்கு எடுத்துச் சென்று நியாயம் கிடைக்க வேண்டும் எனக் கோரி போராட்டத்தில் ஈடுபட்டனா்.

இதுகுறித்து தகவல் அறிந்த நாமக்கல் மாவட்ட கூடுதல் கண்காணிப்பாளா் சண்முகம், திருச்செங்கோடு உட்கோட்ட காவல் துறை துணை கண்காணிப்பாளா் சீனிவாசன் ஆகியோா் ரிக் உரிமையாளா் மணியின் வீட்டிற்கு விரைந்து சென்று செந்தில்குமாரின் உறவினா்களிடம் பேச்சுவாா்த்தை நடத்தினா்.

இறந்துபோன செந்தில்குமாரின் உடல் ஆந்திர மாநிலத்தில் பிரேதப் பரிசோதனை செய்யப்பட்டிருப்பதால் அதன் அறிக்கை வந்த பிறகு அதில் ஏதாவது தவறு இருக்குமானால் உரிய நடவடிக்கை எடுக்கப்படும் என உறுதி அளித்ததன்பேரில் செந்தில்குமாரின் உறவினா்கள் போராட்டத்தைக் கைவிட்டு கலைந்துசென்றனா்.