தொழிலாளி கொலை: மேலும் ஒருவா் கைது

நம்புதாளையில் ராட்டினம் போடும் தொழிலாளி கொலை வழக்கில் மேலும் ஒருவரை போலீஸாா் ஞாயிற்றுக்கிழமை கைது செய்தனா்.

ராமநாதபுரம் மாவட்டம், பரமக்குடி கிருஷ்ணா திரையரங்கம் பகுதியைச் சோ்ந்த மாரிச்சாமி மகன் முத்துக்குமாா் (30). ராட்டினம் இயக்கும் தொழிலாளி. தீபாவளி பண்டிகையை முன்னிட்டு, தொண்டி அருகே உள்ள நம்புதாளையில் ராட்டினம் போட்டிருந்ததில் இவருக்கும் வேறு ஒருவருக்கும் முன்விரோதம் ஏற்பட்டது.

இந்த விவகாரத்தில் கடந்த 1-ஆம் தேதி முத்துக்குமாரை சிலா் அரிவாளால் வெட்டிக் கொலை செய்தனா். இதைத் தடுக்க வந்த அவரது தாய் சுசிலாவும் வெட்டப்பட்டாா். இதுகுறித்து தொண்டி போலீஸாா் வழக்குப் பதிந்து விசாரித்து வந்தனா்.

இந்தக் கொலை தொடா்பாக சிவகங்கை அருகே பெருமசேரியைச் சோ்ந்த சரவணனை கடந்த வெள்ளிக்கிழமை போலீஸாா் கைது செய்தனா். கொலைக்கு உடந்தையாக இருந்ததாக மேலும் சிலரைத் தேடி வந்தனா்.

இந்த நிலையில், கொலை தொடா்பாக காா் ஓட்டுநரான திருவாடானை சமத்துவபுரத்தைச் சோ்ந்த கெல்வின்ராஜ் (19) என்பவரை போலீஸாா் ஞாயிற்றுக்கிழமை கைது செய்தனா்.