தில்லி சட்டப்பேரவைத் தேர்தலில் தோல்வி அடைந்துவிடுவோம் என்ற பயத்தில் கேஜரிவால் பதற்றம் அடைந்துள்ளதாக பிரதமர் நரேந்திர மோடி தெரிவித்தார்.
தில்லி சட்டப்பேரவைத் தேர்தலுக்கான வாக்குப்பதிவு பிப்ரவரி 5 ஆம் தேதி நடைபெறவுள்ளது. ஆம் ஆத்மி, பாஜக மற்றும் காங்கிரஸ் தனித்தனியே மோதுகின்றன.
இதையும் படிக்க : ஆளுநருக்கு நடத்தை விதிகள்! திமுக எம்.பி.க்கள் கூட்டத்தில் நிறைவேற்றப்பட்ட 6 தீர்மானங்கள்!
இந்த நிலையில், வடகிழக்கு தில்லி சட்டப்பேரவைக்கு உட்பட்ட கோண்டாவில் பாஜக வேட்பாளர்களை ஆதரித்து பிரதமர் நரேந்திர மோடி பிரசாரம் செய்தார்.
அப்போது அவர் பேசியதாவது:
“பிப்ரவரி 8 ஆம் தேதி தில்லியில் அமையவுள்ள பாஜக அரசு, அனைத்து வாக்குறுதிகளையும் குறிப்பிட்ட நாள்களில் நிறைவேற்றும். இதுவே மோடியின் வாக்குறுதி.
ஆம் ஆத்மியின் பொய்யான வாக்குறுதிகள் மக்களிடம் வேலை செய்யாது என்பது இங்கு கூடியுள்ள கூட்டத்தால் தெரிகின்றது. ஏழைகளுக்கு வீடு கட்டிக் கொடுக்கும், தில்லியை நவீனமயமாக்கும் இரட்டை என்ஜின் பாஜக அரசை மக்கள் விரும்புகிறார்கள். பிப். 5 ஆம் தேதி ஆம் ஆத்மி விலகி பாஜக வரும்.
தில்லியின் முன்னாள் முதல்வர் ஹரியாணா மக்கள் மீது குற்றச்சாட்டை சுமத்தியுள்ளார். தோற்றுவிடுவோம் என்ற பயத்தில் ஆம் ஆத்மி பதற்றமடைந்துள்ளது. ஹரியாணா மக்கள் தில்லி மக்களிடமிருந்து வேறுபட்டவர்களா? ஹரியாணா மக்களின் உறவினர்கள் தில்லியில் வசிக்கவில்லையா? தில்லி மக்கள் குடிக்கும் யமுனை ஆற்றில் எப்படி ஹரியாணா மக்கள் விஷம் கலப்பார்கள்? ஹரியாணா மக்கள் அனுப்பு தண்ணீரைதான் பிரதமர், நீதிபதிகள் உள்பட அனைவரும் குடிக்கிறோம்.
காங்கிரஸ் மற்றும் ஆம் ஆத்மியின் 25 ஆண்டுகால ஆட்சியை நீங்கள் பார்த்துவிட்டீர்கள். இரண்டு தலைமுறையை அழித்துள்ளனர். இன்னும் போக்குவரத்து நெரிசல், வெள்ளம், காற்றுமாசு இருக்கின்றது. உங்களின் ஒரு வாக்கு அனைத்தையும் மாற்றிவிடும். 11 ஆண்டுகளாக முடிக்கப்படாமல் உள்ள பணிகளையும் அடுத்த 25 ஆண்டுகளுக்கான பணிகளையும் நாங்கள் செய்யவுள்ளோம். ஒருமுறை தாமரைக்கு வாய்ப்பு அளியுங்கள்” எனத் தெரிவித்தார்.
