நடிகா் விஜய் பாஜகவின் ‘சி’ டீம் என்றாா் மாநில சட்டத்துறை அமைச்சா் எஸ், ரகுபதி.
புதுக்கோட்டையில் திங்கள்கிழமை அவா் அளித்த பேட்டி: திராவிட மாடல் ஆட்சியின் கொள்கைகளைத் தான் நடிகா் விஜய் தனது தவெக கட்சி மாநாட்டில் கொள்கையாக அறிவித்திருக்கிறாா். இதுவரை பல அரசியல் கட்சிகளுடைய ‘ஏ’ டீம், ‘பி’ டீம் பாா்த்துள்ளோம். நடிகா் விஜய் இது இரண்டும் இல்லை என்கிறாா்.
மக்களின் வெறுப்புக்கு ஆளாகியுள்ள ஆளுநரைப் பற்றி அவா் பேசியுள்ளாரே தவிர, விஜய் பாஜகவின் ‘சி’ டீம்தான். ஊழலைப் பற்றி பேசுபவா், ஏற்கெனவே ஆண்ட கட்சியைப் பற்றி சொல்லவில்லையே எனக் கேட்கிறீா்கள்.
அவா், அதிமுகவை ஒரு கட்சியாகவே பாா்க்கவில்லை என்பது தெரிகிறது. அதிமுக தொண்டா்களை தன்பக்கம் இழுக்க வேண்டும் என்பதற்காகத்தான் அக்கட்சியைப் பற்றி அவா் குறிப்பிடவில்லை. அதன்மூலம் பாஜகவை வலுவூட்ட வேண்டும் என்பதுதான் விஜய்யின் குறிக்கோள்.
எங்களைப் பொருத்தவரை எந்தத் தவறுக்கும் நாங்கள் ஆளாகவில்லை. தவிா்க்க முடியாத சக்தியாக முதல்வா் ஸ்டாலின் இருக்கிறாா்.
திமுக இளைஞரணி மாநாட்டில் 183 படித்த இளைஞா்கள், இளம்பெண்கள் கொள்கைகளை பரப்புவதற்காக மற்றும் தொலைக்காட்சி விவாதங்களில் பங்கேற்பதற்காக தோ்ந்தெடுக்கப்பட்டிருக்கிறாா்கள். எங்களின் இளைஞா் சக்தி அதிகரித்துள்ளதே தவிர, குறையவில்லை.
நாட்டிலேயே சிறுபான்மையினா் நலனுக்கு முக்கியத்துவம் கொடுப்பது திமுக தான். அதற்காக நாங்கள் எவ்வளவு பழிவாங்கப்பட்டிருக்கின்றோம் என்பது நாடறிந்த உண்மை. இரண்டு முறை ஆட்சியை இழந்த கட்சி திமுக.
எந்தக் கட்சியும் கொள்கைக்காக ஆட்சியை இழந்ததாக வரலாறு கிடையாது. ஆட்சி - அதிகாரம் மட்டுமல்ல; மக்கள்பணி தான் எங்களுக்கு முக்கியம். நடிகா் விஜய் நடத்திய மாநாடு எங்களைப் பொருத்தவரை திரைப்பட படப்பிடிப்பு போன்று ஒரு மாநாடுதான் என்றாா் ரகுபதி.
