‘நீா்நிலைப் பாதுகாவலா்’ விருதுக்கு விண்ணப்பிக்க ஆட்சியா் அழைப்பு

நாமக்கல்: நீா்நிலைகளை பாதுகாப்போருக்கு, தமிழக அரசு சாா்பில் ‘நீா்நிலைப் பாதுகாவலா்’ விருதுகள் வழங்கப்படவுள்ளதால் தகுதியானோா் விண்ணப்பிக்கலாம் என்று நாமக்கல் மாவட்ட ஆட்சியா் ச.உமா தெரிவித்துள்ளாா்.

இது குறித்து அவா் வெளியிட்ட செய்திக் குறிப்பு:

சுற்றுச்சூழலையும், சூழல் அமைப்புகளையும் பாதுகாக்க தமிழக அரசு பல்வேறு நடவடிக்கைகளை மேற்கொண்டு வருகிறது. இந்தச் சூழல் அமைப்புகளுக்கு மூலாதாரமாக விளங்குவது நீா்நிலைகள் ஆகும். இந்தச் சூழல் அமைப்புகளை பாதுகாத்துப் பேணிடவும், மாநிலத்தின் நீா் வளத்தைப் பெருக்கிடவும் அரசு மேற்கொண்டு வரும் முயற்சிகளின் ஒரு பகுதியாக தமிழகம் முழுவதும் உள்ள நீா் நிலைகளைப் பாதுகாவலா்களுக்கு விருதுகள் வழங்கி கெளரவிக்கப்படவுள்ளன.

பொதுமக்கள், தன்னாா்வு தொண்டு நிறுவனங்கள், சமூக அமைப்பினா் நீா் நிலைகளைப் பாதுகாத்திட ஆா்வமுடன் முன்வர வேண்டும் என்கிற எண்ணத்தை விதைக்கவும், அனைத்து மாவட்டங்களிலும், மாவட்டத்திற்கு ஒருவா் வீதம் 38 பேருக்கு முதல்வரின் நீா்நிலைப் பாதுகாவலா் விருதும், ரூ. ஒரு லட்சம் ரொக்கப்பரிசும் வழங்கப்படும் என அரசால் அறிவிக்கப்பட்டுள்ளது.

அதன்படி இந்த ஆண்டிற்கான விருதுகள் விரைவில் வழங்கப்பட உள்ளன. தகுதியானோா் என்ற இணையதளம் மூலம் விண்ணப்பிக்க வேண்டும். இதற்கு வெள்ளிக்கிழமை(ஜன.17) கடைசி நாள் என அதில் தெரிவிக்கப்பட்டது.