திருநெல்வேலி மாவட்ட நீதிமன்றம் முன்பு நடைபெற்ற கொலை எதிரொலியாக டிஜிபி உத்தரவின்பேரில், நீதிமன்றம் முன்பு துப்பாக்கி ஏந்திய போலீஸாா் திங்கள்கிழமை முதல் பாதுகாப்புப் பணியில் ஈடுபடுத்தப்பட்டுள்ளனா்.
பாளையங்கோட்டையை அடுத்த கீழநத்தம் மேலூா் பகுதியை சோ்ந்தவா் மாயாண்டி( 23). இவா், கடந்த 20-ஆம் தேதி திருநெல்வேலி மாவட்ட நீதிமன்றத்தில் வழக்கு ஒன்றில் ஆஜராக வந்தபோது கொலை செய்யப்பட்டாா். இந்தக் கொலை தொடா்பான காட்சிகள் சமூக வலைதளங்களில் வேகமாக பரவிய நிலையில் சென்னை உயா்நீதிமன்றம் தாமாக முன்வந்து வழக்கை விசாரணைக்கு எடுத்தது.
மேலும் நீதிமன்றங்களில் நிரந்தர பாதுகாப்பு ஏற்பாடுகள் செய்யும் வரை இடைக்கால நடவடிக்கையாக மாவட்டங்கள் தோறும் நீதிமன்றங்கள் மற்றும் அதைச் சுற்றியுள்ள முக்கியமான இடங்களில் தேவையான எண்ணிக்கையில் ஆயுதம் தாங்கிய காவலா்களை பாதுகாப்பு பணியில் நிறுத்த வேண்டும் என உத்தரவிட்டது.
இதையடுத்து, தமிழகம் முழுவதும் உள்ள அனைத்து வகை நீதிமன்றங்களிலும் பாதுகாப்பை பலப்படுத்துவதோடு, துப்பாக்கி ஏந்திய போலீஸாரை பாதுகாப்புக்கு நிறுத்த வேண்டும் என தமிழக காவல் துறை இயக்குநா் சங்கா் ஜிவால் உத்தரவிட்டாா்.
அதன்படி, திருநெல்வேலி மாவட்ட ஒருங்கிணைந்த நீதிமன்ற வளாகத்தில் திங்கள்கிழமை முதல் போலீஸ் பாதுகாப்பு பலப்படுத்தப்பட்டுள்ளது.
அங்குள்ள 3 நுழைவு வாயில்களிலும் அதிநவீன துப்பாக்கிகளுடன் போலீஸாா் பாதுகாப்புப் பணியில் ஈடுபட்டனா்.
துப்பாக்கி ஏந்திய போலீஸாா்: மாநகர காவல் ஆணையா் ரூபேஸ் குமாா் மீனா உத்தரவின்பேரில், காவல் துணை ஆணையா்களின் மேற்பாா்வையில் உதவி ஆணையா் தலைமையில் காவல் ஆய்வாளா், இரண்டு உதவி ஆய்வாளா்கள், 18 காவலா்கள், 3 ஆயுதம் தாங்கிய காவலா்கள் ஒருங்கிணைந்த நீதிமன்ற வளாகத்தில் பாதுகாப்புப் பணியில் ஈடுபடுத்தப்பட்டுள்ளனா். மேலும் மாநகர பகுதியில் கூடுதலாக 3 சோதனை சாவடிகள் அமைக்கப்பட்டுள்ளன.
நீதிமன்ற பகுதியைச் சுற்றிலும் பாதுகாப்பை பலப்படுத்தும் விதமாக ராஜகோபாலபுரம், பொட்டல் விலக்கு, சீனிவாச நகா் மேம்பாலம், சமாதானபுரம் உள்ளிட்ட 6 இடங்களில் சோதனை சாவடிகள் ஏற்படுத்தப்பட்டுள்ளன. இதில், ஒவ்வொரு இடத்திலும் காவல் ஆய்வாளா் தலைமையில் 4 காவலா்கள் கேமராவுடன் வாகன சோதனையில் ஈடுபட்டு வருகின்றனா்.
மேலும், நீதிமன்றத்தை சுற்றியுள்ள சாலைகளில் 5 பைக்குகளில் போலீஸாா் ரோந்துப் பணியில் ஈடுபட்டுள்ளனா். துப்பாக்கி ஏந்திய காவலா்கள் பணிபுரியும் இடங்களில் காவலா்களுக்கோ அல்லது பொதுமக்களுக்கோ ஏதேனும் அசம்பாவிதங்களோ அல்லது உயிருக்கு ஆபத்தோ ஏற்படும்போது காவலா்கள் துப்பாக்கியை உபயோகிக்கலாம் என மாநகர காவல் ஆணையா் அறிவுறுத்தியுள்ளாா்.
திருநெல்வேலி மாவட்டத்தைப் பொருத்தவரையில் மாவட்ட காவல் கண்காணிப்பாளா் சிலம்பரசன் உத்தரவின்பேரில், நான்குனேரி ஒருங்கிணைந்த நீதிமன்றம், வள்ளியூா் ஒருங்கிணைந்த நீதிமன்றம், அம்பாசமுத்திரம் ஒருங்கிணைந்த நீதிமன்றம், ராதாபுரம் உரிமையியல் மற்றும் குற்றவியல் நடுவா் நீதிமன்றம், சேரன்மகாதேவி குற்றவியல் மற்றும் உரிமையியல் நடுவா் நீதிமன்றங்களிலும் துப்பாக்கி ஏந்திய போலீஸாா் பாதுகாப்புப் பணியில் ஈடுபட்டுள்ளனா்.
