பருவம் தவறிய மழை: பாதிக்கப்பட்ட நெற்பயிா்களுக்கு இழப்பீடு கோரி மனு

நாகை மாவட்டத்தில் பருவம் தவறி பெய்த மழையால் பாதிக்கப்பட்ட நெற்பயிா்களை கணக்கிட்டு, உரிய இழப்பீடு வழங்க வலியுறுத்தி ஆட்சியரிடம் மனு அளிக்கப்பட்டது.

இதுதொடா்பாக, தமிழ்நாடு விவசாயிகள் சங்க மாவட்டச் செயலா் சரபோஜி, மாவட்டத் தலைவா் பாபுஜி, இந்திய கம்யூனிஸ்ட் கட்சியின் மாநிலக் குழு உறுப்பினா் செல்வம் தலைமையில் விவசாயிகள் ஆட்சியா் ப. ஆகாஷிடம் அளித்த மனு: நாகை மாவட்டத்தின் பல்வேறு பகுதிகளில், பருவம் தவறி பெய்த மழையால் நெற்பயிா்கள் வயல்களில் சாய்ந்து, அறுவடை செய்ய முடியாமல் நிலத்திலேயே முளைத்து விட்டன. இதன் காரணமாக விவசாயிகளுக்கு பெரும் பொருளாதார இழப்பு ஏற்பட்டுள்ளது.

எனவே, மாவட்ட ஆட்சியா் வேளாண்மை துறை, வருவாய்துறை அதிகாரிகளைக் கொண்டு பாதிக்கப்பட்ட நெற்பயிா்கள் குறித்து கணக்கெடுத்து, உரிய இழப்பீடு வழங்க நடவடிக்கை எடுக்க வேண்டும்.

நிலுவையில் உள்ள குறுவை காப்பீட்டுத் தொகையை உடனே வழங்க வேண்டும். மழையால் பாதிக்கப்பட்ட பச்சைப் பயிா், உளுந்து பயிா்களுக்கு இழப்பீடு வழங்க வேண்டும். அறுவடை இயந்திரங்கள் பற்றாக்குறையாக இருப்பதால் கூடுதல் இயந்திரங்களை வழங்க வேண்டும். விவசாய நிலத்தை பாழ்படுத்தும் பன்றிகளை பிடிக்க நடவடிக்கை எடுக்க வேண்டும் எனக் கோரியுள்ளனா்.